Бахши Хадамоти муҳоҷират дар ноҳияи Қубодиён дар ҳамкорӣ бо бахши кор бо ҷавонон ва варзиши ноҳия дар муассисаи хусусии таълимии “Барфигул” вохӯрии судманд баргузор намуданд.
Дар вохӯрии мазкур хонандагон, волидони онҳо ва омӯзгорон иштирок намуда, оид ба масъалаҳои муҳими ҷомеа мубодилаи афкор сурат гирифт. Аз ҷумла, ба масъалаҳои таълиму тарбияи насли наврас, пешгирии қонунвайронкунӣ ва ҷинояткорӣ дар байни ноболиғон, баланд бардоштани ҳисси ватандӯстиву масъулиятшиносӣ, эҳтиром ба арзишҳои миллӣ ва риояи меъёрҳои ахлоқӣ таваҷҷуҳи махсус зоҳир карда шуд.
Ҳамчунин зимни суҳбат ба иштирокдорон мазмуну муҳтавои Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” шарҳ дода шуда, таъкид гардид, ки тарбияи дурусти фарзанд вазифаи ҷонии ҳар як падару модар ва ҷомеа ба ҳисоб меравад.
Дар ҷараёни вохӯрӣ ҳамзамон оид ба аҳамияти таҷлили ҷашни 35-солагии Истиқлоли давлатии Ҷумҳурии Тоҷикистон ва эълон гардидани соли 2026 ҳамчун “Соли вусъат додани корҳои ободониву созандагӣ ва таҳкиму тақвияти худшиносию худогоҳии миллӣ” ибрози назар карда шуда, таъкид гардид, ки ҷавонон ҳамчун нерӯи пешбарандаи ҷомеа бояд дар корҳои созандагиву ободонӣ, ҳифзи арзишҳои миллӣ ва таҳкими ваҳдату суботи ҷомеа саҳми фаъол дошта бошанд.
Масъулин қайд намуданд, ки танҳо дар ҳамбастагии оила, муассисаи таълимӣ ва ҷомеа метавон ҷавонони соҳибмаърифат, ватандӯст ва қонунмеҳварро ба камол расонид.
Дар фарҷоми вохӯрӣ ба саволҳои иштирокдорон ҷавобҳои мушаххас дода шуда, чунин мулоқотҳо барои баланд бардоштани маърифати ҳуқуқии ҷавонон муҳим арзёбӣ гардиданд.
Маркази матбуоти Хадамоти муҳоҷират
