Дар деҳаи Заркамари Ҷамоати деҳоти Заркамари ноҳияи Қубодиён вохӯрии судманд бо иштироки намояндагони бахшҳои Хадамоти муҳоҷират, кор бо ҷавонон ва варзиш, инчунин намояндагони мақомоти корҳои дохилӣ баргузор гардид. Дар вохӯрӣ сокинон, фаъолон, ҷавонон ва падару модарон фаъолона иштирок намуданд.
Зимни баргузории вохӯрӣ баромадкунандагон вобаста ба масъалаҳои муҳими ҷомеа, аз ҷумла пешгирии ҷинояткорӣ ва дигар омилҳои номатлуб дар байни ҷавонон, баланд бардоштани ҳисси ватандӯстиву худшиносии миллӣ, эҳтиром ба арзишҳои миллӣ ва риояи қонунгузории Ҷумҳурии Тоҷикистон ибрози назар намуданд.
Ҳамзамон, ба иштирокчиён мазмуну муҳтавои Қонуни Ҷумҳурии Тоҷикистон “Дар бораи масъулият барои таълиму тарбияи кӯдак” шарҳу тавзеҳ дода шуда, таъкид гардид, ки тарбияи дурусти фарзандон, назорати доимии онҳо ва ҷалби ҷавонон ба илму дониш, касбомӯзӣ ва варзиш яке аз омилҳои асосии пешгирии ҳуқуқвайронкунӣ ба ҳисоб меравад. Дар идомаи вохӯрӣ масъалаҳои марбут ба риояи Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” мавриди баррасӣ қарор гирифта, оид ба арҷгузорӣ ба забони давлатӣ ҳамчун рукни муҳими давлатдорӣ ва нишонаи фарҳангу тамаддуни миллӣ тавсияҳои муфид пешниҳод гардиданд.
Инчунин, намояндагони бахши Хадамоти муҳоҷират вобаста ба танзими раванди муҳоҷирати меҳнатӣ, сафарҳои бехатар ба муҳоҷирати меҳнатӣ, ҳуҷҷатгузории дуруст ва пешгирии муҳоҷирати ғайриқонунӣ ба сокинон маълумоти зарурӣ расониданд. Дар баробари ин, масъалаи пешгирии қурбонии савдои одамон ва роҳҳои ҳифзи шаҳрвандон аз фиребу истисмори гурӯҳҳои ҷиноятӣ шарҳ дода шуда, аз иштирокчиён даъват ба амал оварда шуд, ки ҳангоми сафар ва интихоби ҷойи кор ҳушёру масъулиятшинос бошанд.
Қайд карда шуд, ки чунин вохӯриҳо дар доираи сиёсати созандаи давлату Ҳукумати Ҷумҳурии Тоҷикистон ҷиҳати таҳкими маърифати ҳуқуқӣ, пешгирии омилҳои номатлуб ва баланд бардоштани сатҳи огоҳии шаҳрвандон мунтазам баргузор гардида, барои таъмини суботу оромӣ ва рушди ҷомеа мусоидат менамоянд.
Маркази матбуоти Хадамоти муҳоҷират
