Дар маҷлисгоҳи Хадамоти муҳоҷират бо иштироки муовини вазири меҳнат, муҳоҷират ва шуғли аҳолии Ҷумҳурии Тоҷикистон Норзода Шариф Сангимурод вохӯрии навбатии корӣ бо роҳбарону намояндагони ширкатҳои интиқолдиҳандаи шаҳрвандон ба хориҷи кишвар баргузор гардид.
Сараввал Сардори Хадамоти муҳоҷират Нодирзода Иматшо аз ширкатҳои расмии интиқолдиҳанда шаҳрвандони ҷумҳурӣ ба кори муназзами хориҷа сафарбар карда шудаанд, пурсон шуд. Айни замон, дар Ҷумҳурии Тоҷикистон 30 субъекти хоҷагидор, ки ба интиқоли қувваи корӣ ба хориҷа фаъолият доранд, тавонистанд шаҳрвандони ҷумҳуриро ба кишварҳои ФР ва Аврупо барои фаъолияти меҳнатӣ сафарбар намоянд. Сардори Хадамоти муҳоҷират махсус таъкид намуданд, ки роҳбарони субъекти хоҷагидор вазифадоранд ҳисоботи омориро дақиқ ва саривақтӣ пешниҳод намоянд. Ҳамзамон, дар ҷараёни мулоқот ба масъалаҳои марбут ба муҳоҷирати меҳнатии муташаккил, баланд бардоштани ҳифзи ҳуқуқии шаҳрвандони Ҷумҳурии Тоҷикистон, андешидани чораҳои муштарак оид ба пешгирии вайронкунии қонунгузории муҳоҷирати давлати иқомат, аз ҷумла мубориза бо бақайдгирии сохта ва шуғли ғайриқонунӣ таваҷҷуҳи махсус зоҳир гардид.
Дар ҷараёни вохӯрӣ муовини Вазири меҳнат, муҳоҷират ва шуғли аҳолии Ҷумҳурии Тоҷикистон Норзода Шариф Сангимурод таъкиди хоса ба самтҳои зерин намуд, аз ҷумла, барпо намудани Ассотсиатсияи интиқолдиҳандагони шаҳрвандони ҷумҳурӣ ба хориҷа, муташаккилона сафарбарнамудани шаҳрвандон ба хориҷа, сари вақт ва дуруст ба роҳ мондани маълумот оиди сафарбаркунии шаҳрвандон, ҷоннок намудани ҳамкорӣ бо Хадамоти муҳоҷират ва МД “Агенти бокортаъминкунӣ дар хориҷа”, тақвияти чораҳо оид ба ҳимояи ҳуқуқҳои меҳнатӣ ва иҷтимоии шаҳрвандони Ҷумҳурии Тоҷикистон, баланд бардоштани самаранокии фаъолияти иттилоотӣ-ташвиқотӣ вобаста ба пешгирии ҷинояткорӣ миёни муҳоҷирон, вокуниши саривақтӣ ба муроҷиатҳои шаҳрвандон ва мусоидат дар ҳали ҳолатҳои баҳсӣ дар муносибатҳои меҳнатӣ байни коргарони тоҷик ва корфармоён, суханронӣ намуд.
Инчунин, дар рафти вохӯрӣ масъалаҳои марбут ба таъмини ҳифзи ҳуқуқҳои муҳоҷирон, беҳтар намудани сифати хизматрасонӣ, пешгирии ҳолатҳои фиребу қаллобӣ ва баланд бардоштани сатҳи огоҳии ҳуқуқии шаҳрвандон низ мавриди таваҷҷуҳ қарор гирифтанд.
Маркази матбуоти Хадамоти муҳоҷират
