Дар шароити ҷаҳонишавӣ ва рушди босуръати технологияҳои иттилоотӣ инсоният ба дастовардҳои бузурги илмӣ ва фарҳангӣ ноил гардидааст. Дар баробари ин, таҳдиду хатарҳои нав низ ба миён омадаанд, ки яке аз онҳо ифротгароӣ ва терроризм мебошад. Ин зуҳуроти номатлуб ба амнияту суботи давлатҳо, ҳаёти осоиштаи мардум ва рушди ҷомеа таъсири манфӣ расонида, ҳамчун яке аз масъалаҳои мубрами замони муосир эътироф гардидааст.

Ҷумҳурии Тоҷикистон ҳамчун давлати соҳибистиқлол аз рӯзҳои аввали ба даст овардани истиқлолият масъалаи таъмини сулҳу субот, ваҳдати миллӣ ва амнияти шаҳрвандонро дар меҳвари сиёсати давлатӣ қарор додааст. Маҳз ба шарофати сиёсати хирадмандонаи роҳбарияти давлат ва пуштибонии мардуми сарбаланди кишвар имрӯз Тоҷикистони азиз ба як кишвари орому босубот табдил ёфтааст. Аз ин рӯ, ҳифзи ин неъмати бебаҳо вазифаи муқаддаси ҳар як шаҳрванди ватандӯст мебошад.

Ифротгароӣ пеш аз ҳама тавассути таблиғи ақидаҳои бегона, таҳриф намудани арзишҳои динӣ ва миллӣ, инчунин истифодаи нодурусти шабакаҳои иҷтимоӣ миёни ҷавонон паҳн мегардад. Баъзе гурӯҳҳои манфиатҷӯ бо истифода аз сатҳи пасти маърифати ҳуқуқӣ ва сиёсӣ кӯшиш менамоянд ҷавононро ба роҳҳои нодуруст ҷалб намоянд. Аз ин рӯ, баланд бардоштани сатҳи маърифат, худшиносии миллӣ ва эҳсоси ватандӯстӣ яке аз роҳҳои муҳими пешгирии ин падида ба ҳисоб меравад.

Нақши оила дар тарбияи фарзандон дар ин самт хеле муҳим аст. Падару модар бояд ба таълиму тарбияи фарзандон диққати ҷиддӣ дода, онҳоро дар руҳияи эҳтиром ба Ватан, миллат, фарҳанг ва арзишҳои миллӣ ба воя расонанд. Ҳамзамон, муассисаҳои таълимӣ, зиёиён ва фаъолони ҷомеа низ дар баланд бардоштани сатҳи огоҳии ҷавонон масъулияти калон доранд.

Таҷриба нишон медиҳад, ки ҷавонони соҳибмаърифат, дорои ҷаҳонбинии васеъ ва ҳисси баланди масъулиятшиносӣ ба доми гурӯҳҳои ифротӣ намеафтанд. Аз ин рӯ, омӯзиши илм, касбомӯзӣ, истифодаи дурусти технологияҳои муосир ва иштироки фаъолона дар ҳаёти ҷомеа бояд аз самтҳои асосии фаъолияти ҷавонон бошад.

Имрӯз аз ҳар яки мо талаб карда мешавад, ки нисбат ба сарнавишти давлат ва ҷомеа бетараф набошем. Ҳифзи сулҳу субот, таҳкими ваҳдати миллӣ ва мубориза бо ҳар гуна зуҳуроти номатлуб масъулияти шаҳрвандии ҳар як фарди ҷомеа мебошад. Танҳо бо муттаҳидӣ, ҳушёрии сиёсӣ ва эҳсоси баланди ватандӯстӣ метавонем ҷомеаро аз хатари ифротгароӣ ҳифз намуда, барои наслҳои оянда Тоҷикистони ободу пешрафтаро ба мерос гузорем.

Алимардонов Ф., 

мудири бахши Хадамоти муҳоҷират дар ноҳияи Қубодиён