Бо ибтикори бахши Хадамоти муҳоҷират дар шаҳри Конибодом аз 3 то 10 августи соли 2026 сол вохӯрии судманд дар деҳаҳои Санҷидзор, Лоҳутӣ ва Сомониён доир ба пешгирӣ ва мубориза ба муқобили падидаҳои номатлуб ва хатарҳои ҷаҳони муосир, пеш аз ҳама терроризму экстремизм, муҳоҷирати бехатар мубориза бо бемориҳои сироятӣ, тарғибу ташвиқи тарзи ҳаёти солим, ҷалби ғайриқонунии шаҳрвандони кишвар ба давлатҳои хориҷа, коҳиш додани муҳоҷирати меҳнатии занон, ҷалби муҳоҷирони меҳнатии воридшавиашон манъгардида ба НБО “Роғун доир намуда, дар якҷоягӣ бо иштироки намояндагони мақомоти иҷроияи ҳокимияти давлатии шаҳр, ҲХДТ, раисони маҳаллаҳо ва дигар сохторҳо баргузор гардид.
Мақсад аз баргузории вохӯрии мазкур ин расонидани нуктаҳои асосии Паёми навбатии Президенти Ҷумҳурии Тоҷикистон Пешвои миллат муҳтарам Эмомалӣ Раҳмон ба Маҷлиси Олии кишвар ва дар ин замина таъмини тозагиву озодагии иншооту биноҳо, ташкилоту муассисаҳо, кӯчаву маҳаллаҳо, манзили истиқоматии ҳар як оила дар деҳот бо мақсади сазовор таҷлил намудани ҷашни 35-солагии Истиқлоли давлатии Ҷумҳурии Тоҷикистон, огоҳ намудани ҷавонон аз хатарҳои экстремизм ва терроризм, тақвият додани корҳои ободониву созандагӣ, истифодаи самараноки заминҳои наздиҳавлигӣ, пешгирии ҷудошавии оилаҳои ҷавон, пешгирии зӯроварӣ дар оила ва фарогирифтани занону духтарон ба курсҳои касбомӯзӣ, муҳоҷирати бехатар, риояи қонунҳои амалкунанда, ҷалби ҷавонон ба сафи Қувваҳои Мусаллаҳи Ҷумҳурии Тоҷикистон, пешгирии тамоюли бегонапарастӣ ва ҳаллу фасли масъалаҳои мубрами рӯз ҳисоб меравад.
Ҳамзамон, намояндаи бахши Хадамоти муҳоҷират таваҷҷуҳи иштирокдоронро оид ба муҳоҷират ба маълумоти шаҳрвандон, ки дар қаламрави Россия фаъолияти меҳнатӣ анҷом медиҳанд, мерасонад, ки Руйхати шахсони назоратшаванда (РШН) дар низоми худкор фаъолият намуда, маълумот дар он ҳар 4 соат бо назардошти иттилооти навшуда оид ба шаҳрвандони хориҷӣ иваз мегардад.
Ба Руйхати шахсони назоратшаванда кадом маълумоти шаҳрванди хориҷӣ ворид мегардад: Муҳлати будубоши муваққатӣ дар қаламрави Федератсияи Россия; Гирифтан ё тағйир ёфтани мақоми муҳоҷиратӣ; Мавҷудияти ҳуҷҷатҳое, ки ҳуқуқи анҷом додани фаъолияти меҳнатиро тасдиқ мекунанд; Қарорҳои ба қувваи қонунӣ даромадаи суд, аз ҷумла ҳукмҳои айбдоркунанда, қарорҳо дар бораи ихроҷ, берункунӣ (выдворение), номатлуб эътироф намудани будубош, манъи воридшавӣ ва ё қатъ гардидани шаҳрвандӣ.
Ҳамчунин, шаҳрвандони хориҷӣ ва шахсони бешаҳрванд дар ҳолатҳое ба Руйхат ворид карда мешаванд, ки ҳуҷҷатҳои иҷозатдиҳанда ё мақоми ҳуқуқии онҳо бекор гардида бошад.
Шаҳрвандон метавонанд мустақилона ва ройгон, тариқи портали ВКД-и Россия (пайванд: https://мвд.рф/rkl ) санҷанд, ки оё номи онҳо дар Феҳристи шахсони назоратшаванда мавҷуд аст ё не. Барои ин зарур аст маълумоти зерин ворид карда шавад: ному насаб (ФИО); санаи таваллуд (рӯз, моҳ, сол); силсила ва рақами ҳуҷҷати тасдиқкунандаи шахсият; санаи додани ҳуҷҷат.
Хадамоти муҳоҷират ба шаҳрвандон тавсия медиҳад, ки мунтазам вазъи ҳуқуқии худро назорат намуда, талаботи қонунгузории Федератсияи Россияро қатъиян риоя намоянд, то аз ворид шудан ба Реестри шахсони назоратшаванда ва паёмадҳои ҳуқуқии он пешгирӣ карда шаванд.
Маркази матбуоти Хадамоти муҳоҷират
