Истиқлоли давлатӣ барои ҳар як миллат бузургтарин неъмати таърихӣ ва асоси ҳастии давлату давлатдорӣ ба ҳисоб меравад. Барои миллати тоҷик низ соҳибистиқлол гардидани Тоҷикистон оғози марҳилаи нави таърихи давлатдорӣ буда, имконият фароҳам овард, ки халқ роҳи мустақили рушди сиёсӣ, иқтисодӣ, иҷтимоӣ ва фарҳангии худро муайян намояд.
Имрӯз, ки Тоҷикистон 35-солагии Истиқлоли давлатии худро таҷлил менамояд, ҳар як шаҳрванди кишвар бо эҳсоси ифтихор ба роҳи тайкардаи давлат назар мекунад. 35 соли соҳибистиқлолӣ роҳи осон набуд. Солҳои аввали истиқлол барои Тоҷикистон давраи мураккабу пурмасъулият ба шумор мерафт. Дар чунин шароити душвор ҳифзи давлатдорӣ, барқарор намудани сулҳу субот ва таъмини ваҳдати ҷомеа вазифаи муҳимтарин гардид. Бо талошҳои пайвастаи роҳбарияти давлат ва иштироки фаъоли мардуми Тоҷикистон сулҳу ваҳдати миллӣ таъмин гардид ва кишвар ба роҳи созандагӣ қадам гузошт.
Имрӯз сулҳу субот ва ваҳдати миллӣ ҳамчун заминаи асосии пешрафти Тоҷикистон шинохта мешаванд. Таҷрибаи солҳои соҳибистиқлолӣ нишон медиҳад, ки танҳо дар фазои оромию субот давлат метавонад барномаҳои рушди иқтисодӣ ва иҷтимоиро амалӣ намояд. Аз ин рӯ, ҳифзи сулҳ, таҳкими ваҳдат ва эҳтироми арзишҳои миллӣ вазифаи ҳар як шаҳрванди кишвар мебошад.
Дар давоми 35 соли истиқлол дар соҳаҳои гуногуни ҳаёти мамлакат тағйироти назаррас ба амал омаданд. Сохтмони роҳҳо, муассисаҳои таълимӣ, марказҳои тиббӣ, корхонаҳои истеҳсолӣ, иншооти фарҳангиву варзишӣ ва дигар иншооти иҷтимоӣ симои шаҳру ноҳияҳоро тағйир доданд. Корҳои ободониву созандагӣ бахусус дар арафаи ҷашни 35-солагии Истиқлоли давлатӣ вусъати бештар пайдо намудаанд. Ин раванд нишонаи муҳаббати мардум ба Ватан ва хоҳиши ободу пешрафта дидани кишвари азиз мебошад.
Дар даврони соҳибистиқлолӣ масъалаи эҳёи арзишҳои миллӣ низ таваҷҷуҳи махсус пайдо кард. Забони тоҷикӣ, фарҳанг, адабиёт, ҳунарҳои мардумӣ, либоси миллӣ, расму ойин ва мероси таърихии халқ ҳамчун ҷузъҳои муҳими худшиносии миллӣ бештар ҳифз ва тарғиб карда мешаванд. Эҳтироми таърих ва фарҳанги миллӣ маънои онро дорад, ки мо гузаштагони худро мешиносем ва барои нигоҳ доштани арзишҳои ба мерос гузоштаи онҳо масъулият эҳсос мекунем.
Ҷашни 35-солагии Истиқлоли давлатӣ танҳо як санаи тақвимӣ нест. Ин ҷашн моро водор месозад, ки ба дастовардҳои солҳои гузашта назар карда, вазифаҳои ояндаро низ муайян намоем. Имрӯз аз ҳар як шаҳрванди кишвар муносибати масъулона ба ободии маҳалли зист, ҳифзи муҳити зист, эҳтироми қонун, донишомӯзӣ ва меҳнати ҳалол талаб карда мешавад. Дар ин раванд ҷавонон нақши махсус доранд. Ҷавонон қувваи созанда ва ояндаи давлат мебошанд. Онҳо бояд аз имкониятҳои мавҷуда самаранок истифода намуда, соҳиби касбу ҳунар шаванд, илму дониш омӯзанд ва дар корҳои ҷамъиятӣ фаъол бошанд. Ҷавони соҳибмаърифат метавонад на танҳо барои зиндагии худ, балки барои пешрафти ҷомеа низ саҳми арзанда гузорад.
Истиқлолият ҳамчунин масъулияти бузург аст. Муҳофизати дастовардҳои давлатдорӣ танҳо вазифаи мақомоти давлатӣ набуда, масъулияти умумии ҷомеа мебошад. Ҳар як шахс метавонад бо меҳнати софдилона, риояи қонун, эҳтироми дигарон, ҳифзи табиат ва обод намудани муҳити зисти худ дар пешрафти Ватан саҳм гузорад. Имрӯз, дар остонаи ҷашни 35-солагии Истиқлоли давлатии Ҷумҳурии Тоҷикистон, вазифаи ҳар як шаҳрванди ватандӯст аз он иборат аст, ки барои таҳкими сулҳу ваҳдат, рушди ҷомеа ва ободии кишвар саҳмгузор бошад. Ватан танҳо сарзамин нест; Ватан хона, кӯча, маҳалла, деҳа ва шаҳре мебошад, ки ҳар яки мо дар он зиндагӣ мекунем. Агар ҳар як инсон барои ободии маҳалли худ кӯшиш намояд, маҷмӯи ҳамин корҳои нек ба пешрафти тамоми кишвар мусоидат мекунад.
35 соли Истиқлолият барои миллати тоҷик мактаби бузурги давлатдорӣ, созандагӣ ва худшиносӣ мебошад. Ин давра нишон дод, ки бо муттаҳидӣ, меҳнати софдилона ва эҳтироми арзишҳои миллӣ метавон барои ояндаи беҳтар замина гузошт. Бигзор 35-солагии Истиқлолияти давлатии Ҷумҳурии Тоҷикистон барои ҳар як сокини кишвар рамзи сулҳу оромӣ, ваҳдат, пешрафт ва умеди нек ба фардо бошад. Бигзор Тоҷикистони соҳибистиқлол боз ҳам ободу пешрафта гардад ва насли имрӯзу оянда бо ифтихор номи Ватанро баланд бардорад. Истиқлолият арзиши бузургест, ки ҳифзи он масъулияти ҳар як шаҳрванди Тоҷикистон мебошад
Сулҳия Назарова,
Мудири бахши Хадамоти муҳоҷират дар ноҳияи Ашт
