Дар доираи сиёсати давлатӣ дар самти баланд бардоштани маърифати ҳуқуқӣ, густариши корҳои иттилоотию фаҳмондадиҳӣ ва таҳкими огоҳии шаҳрвандон аз талаботи қонунгузорӣ, кормандони дастгоҳи марказии Хадамоти муҳоҷират ва Муассисаи давлатии «Марказҳои машваратӣ ва омодагӣ пеш аз сафари муҳоҷирони меҳнатӣ» дар шаҳри Душанбе бо шаҳрвандон чорабинии иттилоотию фаҳмондадиҳӣ баргузор намуданд.

Чорабинии мазкур дар Маркази сершуғли муҳоҷират баргузор гардида, ҳадафи асосии он шарҳу тавзеҳи талаботи қонунгузории амалкунанда, баланд бардоштани сатҳи огоҳии шаҳрвандон, пешгирии ҳуқуқвайронкуниҳо ва мусоидат ба фаъолияти қонунии шаҳрвандони кишвар дар хориҷи мамлакат арзёбӣ гардид.

Зимни вохӯрӣ ба иштирокчиён оид ба масъалаҳои мубрами соҳаи муҳоҷират, тартиби омодагӣ ба сафар, риояи талаботи қонунгузории кишварҳои қабулкунанда ва роҳҳои ҳифзи ҳуқуқу манфиатҳои муҳоҷирони меҳнатӣ маълумоти зарурӣ пешниҳод карда шуд.

Таъкид гардид, ки риояи ҳатмии қонунгузории кишварҳои қабулкунанда, эҳтиром ба арзишҳои фарҳангиву иҷтимоӣ, муносибати масъулиятнок ба фаъолияти меҳнатӣ ва донистани ҳуқуқу уҳдадориҳои худ аз омилҳои муҳимми таъмини амният ва ҳифзи манфиатҳои муҳоҷирони меҳнатӣ ба ҳисоб меравад.

Дар баробари ин, ба масъалаҳои касбомӯзӣ, омӯзиши забонҳои хориҷӣ ва фароҳамсозии имкониятҳои шуғли шаҳрвандон дар дохили кишвар таваҷҷуҳи хосса зоҳир карда шуд.

Дар ин замина, ба шаҳрвандон иттилоъ дода шуд, ки дар назди Муассисаи давлатии «Марказҳои машваратӣ ва омодагӣ пеш аз сафари муҳоҷирони меҳнатӣ» дар шаҳри Душанбеи Хадамоти муҳоҷират курсҳои омӯзиши забони русӣ ба таври ройгон ба роҳ монда шудаанд. Шаҳрвандони хоҳишманд метавонанд аз ин имконият истифода намуда, ҷиҳати такмили донишу малакаҳои забонии худ дар курсҳои мазкур иштирок намоянд.

Зикр гардид, ки омӯзиши забони русӣ барои шаҳрвандоне, ки нияти сафар ба хориҷи кишвар ва фаъолияти меҳнатӣ доранд, яке аз омилҳои муҳими мутобиқшавӣ ба муҳити иҷтимоиву меҳнатӣ ва ҳифзи ҳуқуқу манфиатҳои онҳо ба ҳисоб меравад.

Ҳамзамон, дар ҷараёни чорабинӣ масъалаҳои пешгирии шомилшавии ҷавонон ба ҳизбу ҳаракатҳои ифротгаро, таҳкими худшиносиву худогоҳии миллӣ, баланд бардоштани маърифати сиёсиву ҳуқуқӣ ва масъулияти шаҳрвандӣ мавриди баррасӣ қарор гирифтанд.

Дар фарҷоми вохӯрӣ иштирокчиён вобаста ба масъалаҳои мавриди таваҷҷуҳ саволҳои худро пешниҳод намуда, посухҳои мушаххас гирифтанд. Ҳамчунин, ба онҳо оид ба тартиби омодагӣ пеш аз сафар, риояи қонунгузории кишварҳои қабулкунанда ва истифодаи имкониятҳои мавҷуда маълумоти иловагӣ пешниҳод карда шуд.

Баргузории мунтазами чунин чорабиниҳои иттилоотию фаҳмондадиҳӣ ба баланд бардоштани сатҳи огоҳии шаҳрвандон, пешгирии ҳолатҳои номатлуб дар раванди муҳоҷират, таҳкими фарҳанги ҳуқуқӣ ва мусоидат ба ҳифзи ҳуқуқу манфиатҳои шаҳрвандони кишвар равона гардидааст.

Маркази матбуоти Хадамоти муҳоҷират