Дар ҳошияи дастуру ҳидоятҳое, ки аз мулоқоти Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон бо намояндагони ҷомеаи кишвар ва ходимони дин, аз 9-уми марти соли ҷорӣ бармеоянд, дар ноҳияи Темурмалик аз ҷониби сохторҳои дахлдор бо сокинону фаъолон вохӯриҳои судманд баргузор шуда истодааст.

Чунин вохӯрӣ дар Ҷамоати шаҳраки Баҳманруд дар толори гимназияи вилоятӣ барои хонандагони болаёқат ба номи Ҳ. Ҳафизови ноҳия баргузор шуд.

Дар вохӯрӣ раиси дастгоҳи ноҳия Талбакзода Рухшона, намояндагон аз ҷамоати шаҳрак, бахши Хадамоти муҳоҷират, роҳбарияти гимназия ва сокинони ҷамоат ширкат варзиданд.

Зимни суханрониҳо ба ҳозирин оид ба мубориза бар зидди хурофотпарастию таассубгароӣ, фолбиниву ҷодугарӣ, бегонапарастӣ, зиёдаравӣ, роҳ надодан ба шомилшавии ҷавонон ба ҳизбу ҳаракатҳои ифротӣ, инчунин, пешгирии баргузории маъракаҳои серхарҷу дабдабаноки ҳоҷиталбон, ҳоҷизиёрат, танзими либосҳои ба фарҳанги мо бегона ва оиди будубош дар хориҷи кишвар, донистани забони давлати қабулкунанда ва бурдани корҳои фаҳмондадиҳӣ миёни мардум дар ин самт тавсияҳо дода шуд.

Дар рафти мулоқот баромадкунандагон аз таъкидҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар мулоқоташон бо намояндагони ҷомеа ва ходимони дин ёдоварӣ намуда, зикр карданд, ки танҳо дар сурати муборизаи қатъӣ ва ҳамкориву ҳамбастагии мақомоти дахлдор ва аҳли ҷомеа метавон ба решакан намудани падидаҳои номатлубу хатарнок даст ёфт.

Раёсати Хадамоти муҳоҷират дар вилояти Хатлон