Тибқи Нақшаи чорабиниҳои муштарак вохӯрии гурӯҳи корӣ Раёсати Хадамоти муҳоҷират дар шаҳри Душанбе дар якҷоягӣ бо кормандони шуъбаву бахшҳои ноҳия бо сокинони кӯчаи Деҳнаваки поёни ноҳияи Исмоили Сомонӣ пойтахт баргузор гардид.
Дар рафти чорабинӣ кормандони масъули Раёсати Хадамоти муҳоҷират дар шаҳри Душанбе Наботов Н., Сайғуфронов Ф., Шарипов Т., ва Сафаров Ф., ба ҳозирин оид ба тағйиру иловаҳои нав дар қонунгузории Федератсияи Россия дар самти муҳоҷират, аз ҷумла будубоши шаҳрвандон дар кишвари қабулкунанда, доштани касби муносиб, гирифтани Патент, иҷозаи кор, бастани шартномаи меҳнатӣ бо кордиҳанда ва дигар масъалаҳои мубрами рӯз суханронӣ намуданд.
Ҳамзамон дар вохӯрӣ бо сокинон масълаҳои бо кору шуғл таъмин намудани ҷавонон, ҷалби бештари онҳо ба касбу ҳунаромӯзӣ, тарғиби тарзи ҳаёти солим, инчунин дар масъалаҳои пешгирии ҷинояткорӣ ва ҳамроҳшавии ҷавонон ба ҳизбу ҳаракатҳои ифротӣ мавриди баррасӣ қарор гирифт.
Таъкид гардид, ки мақомоти марбутаи давлатӣ барои ҳал кардани мушкилӣ ва дархостҳои ҷавонон омода буда, баҳри татбиқи барномаҳои давлатӣ дар соҳаи дастгирии ҷавонон тамоми чораҳои заруриро таҳия ва амалӣ менамояд.
Аз иштирокдорони вохӯрӣ тақозо карда шуд, ки дар тарбияи наврасону ҷавонон дар руҳияи худогоҳию худшиносии миллӣ, арҷгузорӣ ба таъриху фарҳанги пурғановати миллати тоҷик, мубориза бар зидди таҳдиду хатарҳои ҷаҳони муосир, хурофотпарастӣ, ифротишавии мафкураи насли наврас ва пешгирии ҳама гуна зуҳуроти халалдоркунандаи тартиботу оромӣ, саҳм гузоранд.
Дар фарҷоми мулоқот иброз гардид, ки имрӯзҳо бо дастгирии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бахшида ба ҷашни 35-солагии Истиқлолияти давлатии Ҷумҳурии Тоҷикистон дар тамоми минтақаҳои мамлакат, аз ҷумла ноҳияҳои шаҳри Душанбе раванди корҳои ободонию созандагӣ бомаром идома дорад. Дар баробари ин якчанд лоиҳаҳои бузурги инвеститсионӣ дар ҳоли амалишавӣ қарор доранд, ки имкони бо шуғли мавсимӣ фаро гирифтани ҷавонони бекорро доранд.
Раёсати Хадамоти муҳоҷират дар шаҳри Душанбе
