Корманди масъули Агентии назорати давлатии молиявӣ ва мубориза бо коррупсияи Ҷумҳурии Тоҷикистон Розиқзода Алихони Абдулҳаким бо иштироки муовини якуми Сардори Хадамоти муҳоҷират Шарифзода Маҳмадсалим Пир, кормандони дастгоҳи марказии Хадамоти муҳоҷират ва МД “Марказҳои машваратӣ ва омодагии пеш аз сафари муҳоҷирони меҳнатӣ” оид ба пешгирии амалҳои коррупсионӣ, пурзӯр намудани мубориза бар зидди коррупсия ва пешгирию рафъи омилҳои ба коррупсия мусоидаткунанда вохӯрӣ намуд.
Дар ҷамъомад иброз гардид, ки муқовимат ба коррупсия ва паст кардани сатҳи он аз муборизаи дастҷамъона, савияи баланди маърифати ҳуқуқии зиддикоррупсионӣ ва шуурнокии ҳар фарди ҷомеа вобастагӣ дорад. Ҳамзамон ҳамоҳанг сохтани қонунгузории миллии мамлакат дар ҳамбастагию ҳамкории судманди ҷомеа бо кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон ба пешгирии коррупсия мусоидат менамояд.
Мақсад аз баргузории ин гуна вохӯрӣ фаҳмонидани моҳияти сиёсати давлат дар самти муқовимат ба коррупсия, тарғибу ташвиқи санадҳои меъёрии ҳуқуқӣ барои пурзӯр намудани мубориза бар зидди коррупсия, пешгирию рафъи омилҳои ба коррупсия мусоидаткунанда, дар ҷомеаи шаҳрвандӣ ба амал овардани руҳияи зиддикоррупсионӣ ва баланд бардоштани маърифати ҳуқуқии шаҳрвандон мебошад.
Бо мақсади пешгирии ҷиноятҳои коррупсионӣ, паст намудани шиддати коррупсия, аз байн бурдани омилҳои ба коррупсия мусоидаткунанда ва татбиқи «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» тибқи нақша мунтазам бо кормандони сохторҳои зертобеи Хадамоти муҳоҷират вохӯриҳо баргузор мегардад.
Маркази матбуоти Хадамоти муҳоҷират
