Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд аз оғози таъсисёбиаш ҳамкории босамарро бо воситаҳои ахбори омма, аз ҷумла Кумитаи телевизион ва радиои вилоят ба роҳ мондааст. Лозим ба ёдоварист, ки ин ҳамкорӣ дар самти баланд бардоштани сатҳи маърифати аҳли ҷомеа, аз ҷумла муҳоҷирони меҳнатӣ ва аъзои оилаи онҳо самараи хуб дода истодааст.
Дар доираи ин ҳамкорӣ рӯзи 09 ноябр барномаи “Суҳбати рӯз”-и радиои вилоят ба масъалаи рафти татбиқи “Муҳоҷирати бехатар” бахшида шуд. Дар ин чорабинӣ Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғдро сармутахассиси шуъбаи муҳоҷирати меҳнатии Раёсат Рустам Ҷамолов намояндагӣ кард.
Зимни саволу ҷавоби мустақими радиоӣ ӯ ба саволҳои шунавандагон вобаста ба муҳоҷирати бехатар ва муқовимат ба савдои одамон ҷавобҳои мушаххас дод. Саволҳои додашуда асосан оид ба корҳои анҷомдодаи Раёсат дар самти паст намудани хавфи қурбонии савдои одамон, ҳамкории Раёсат бо ташкилотҳои ҷамъиятӣ ва ҳуқуқҳимоякунанда дар хориҷа, диаспораҳо ва марказҳои миллӣ – фарҳангии ҳамватанони бурунмарзӣ дар самти ҳимояи ҳуқуқу озодиҳои муҳоҷирон, тадбирҳо баҳри таъмини муҳоҷирати бехатар, роҳандозии корҳои фаҳмандадиҳӣ дар байни аҳли ҷомеа, кушода шудани сарҳадҳо ва рафту омади муҳоҷирони меҳнатӣ ба Федератсияи Россия буд.
Рустам Ҷамолов дар поёни мусоҳибаи радиоӣ вобаста ба муҳоҷирати бехатар маслиҳатҳои муфид дода, аз шаҳрвандон даъват ба амал овард, ки қабл аз муҳоҷират худро ҳаматарафа омода намуда пеш аз сафар ба хориҷи кишвар ба Раёсати Хадамоти муҳоҷират дар вилояти Суғд ва ё шӯъбаю бахшҳои Хадамоти муҳоҷират дар шаҳру ноҳияҳои вилоят муроҷиат намоянд.
Раёсати Хадамоти муҳоҷират дар вилояти Суғд
