Дар замони имрӯза амалҳои террористию ифротгароӣ дар баъзе мамлакатҳо беш аз пеш доман паҳн карда истодаанд. Чӣ тавре ки пешгирии беморӣ нисбат ба табобат осонтар аст, имрӯз аҳли ҷомеаро лозим аст, ки баҳри пешгирии ин зуҳуроти номатлуб аз тамоми имконияту воситаҳо истифода намоянд.
Ба гурӯҳҳои ифротӣ аксаран ҷавононе шомил мешаванд, ки рӯзҳои вазнини гузаштаро надидаанд. Дар бораи он ки мардуми мо чӣ давраҳои вазнинро аз сар гузаронидаанд, тасаввуроти комил надоранд, агар нақл кунӣ, баъзан бовариашон намеояд.
Дар ёд дорем, ки солҳои аввали соҳибистиқлолӣ мардуми мо зиндагии хубу оромона надоштанд. Мо, насли имрӯзаи калонсолу миёнсол айёми душвори ҷанги бародаркушӣ, сатҳи пасти зиндагӣ, нооромиро аз сар гузаронидаем. Он айём бунёди хонаҳои монанди имрӯза дорои шароитҳои хуб, истироҳати бофароғат, саёҳат ба мамлакатҳои дигар, харидани мошину анҷомҳои пурарзиши рӯзгорро танҳо орзу мекардем.
Вале сад афсӯс, ки бархе аз ҷавонони ношукру носипос ин ҳама пешравиҳоро гӯё намебинанд. Ба назар чунин мерасад, ки онҳо хубу бад, сиёҳу сафед, савобу гуноҳ, хираду ҷаҳолат, осудагиву нооромиро аз ҳам фарқ карда наметавонанд. Барои ин гуна инсонҳо шараф, виҷдон, хештаншиносӣ, муқаддасот барин арзишҳо қадру қимате надоранд.
Бепарвоию бетарафӣ ҳамеша боиси раҳгум задан мешавад. Аксар нафарони ба созмонҳои террористӣ шомилшуда ана ҳамин гуна инсонҳои бетарафанд. Онҳоро натанҳо тақдири худашон, балки ояндаи Ватан, падару модар, зодгоҳ, пайвандон заррае ба ташвиш намеорад. Худ бехабар ба доми фиреби гурӯҳҳои ифротиву тафриқаангез гирифтор мешаванд.
Беш аз пеш доман паҳн карда истодани амалҳои терорристию ифротгароиро дида, мавқеи бетарафиро ишғол кардан гуноҳи нобахшиданист. Ҳар лаҳза ва дар ҳама ҷо барои рафъи падидаҳои номатлуб муборизаи дастҷамъонаю беамон бурдан вазифаи ҳар як шаҳрванди ҷомеа мебошад, ки Ватани худро дӯст медорад, обрӯю нуфузи онро авло медонад.
Мо, бояд тамоми воситаю имкониятҳоро ба кор барем, то дар вуҷуди насли наврас меҳру муҳаббати сарзамине, ки дар он умр ба сар мебаранд, бештару қавитар гардад.
Борониева Сакина,
Мутахассиси пешбари шуъбаи қабул ва маслиҳатдиҳӣ Раёсати Хадамоти муҳоҷират дар шаҳри Душанбе
