Бурдани корҳои фаҳмондадиҳӣ дар байни муҳоҷирони меҳнатӣ пеш аз сафар аз ҷониби кормандони масъули дастгоҳи марказии Хадамоти муҳоҷират ва Раёсати он дар шаҳри Душанбе дар “Фурудгоҳи байналмилалии шаҳри Душанбе” ҳамрӯза идома дорад.
Мақсади асосӣ ин баланд бардоштани сатҳи омодагии муҳоҷирон пеш аз сафар ба хориҷи кишвар, огоҳ будан аз қонунгузориҳои нави кишвари қабулкунанда, аз ҷумла Федератсияи Россия мебошад.
Кормандони масъули Хадамоти муҳоҷират ҳангоми суҳбат бо муҳоҷирон – шаҳрвандони ҷумҳурӣ оид ба масъалаҳои тарзи фаъолияти меҳнатӣ, дуруст пур кардани корти муҳоҷират, тартиби расман гирифтани иҷозатнома (патент), муҳлати иҷозатнома, тарзи дароз намудани муҳлати иҷозатнома, арзиши он, гузаштани муоинаи тиббӣ, гирифтани полиси суғуртавӣ,Сертификат оид ба донистани забони русӣ, таърих ва асосҳои қонунгузории Федератсияи Россия, тартиби дар қайди ҷойи истиқомат гузоштани шаҳрвандони хориҷа, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар фаҳмонида шуд.
Инчунин, ба шаҳрвандон доир ба истифодаи дурусти шабакаҳои иҷтимоӣ якчанд дастур доданд, ки тариқи телефонҳои мобилӣ низ ба гурӯҳҳое, ки оиди дуруст ё нодуруст буданаш маълумот надоранд шинос нашаванд ва фирефтаи нафарони бадхоҳ ва душманони миллат нагарданд.
Ҳамзамон, ба таваҷҷуҳи шаҳрвандони Ҷумҳурии Тоҷикистон расонида шуд, ки дар қаламрави Федератсияи Россия қарор доранд, ҳуқуқ доранд, ки аз шаҳодатномаи ронандагии миллӣ (Тоҷикистон) ҳангоми идораи воситаи нақлиёт бо мақсади иҷрои корҳои шахсӣ истифода намоянд.
Пас аз ҳукми амал даромадани талаботҳои қонунгузории Федератсияи Россия аз 1 апрели соли 2025 шаҳрвандони хориҷӣ метавонанд, танҳо бо мақсади иҷрои корҳои шахсӣ дар ҳудуди Федератсияи Россия шаҳодатномаи ронандагии миллӣ ва байналмилалии худро истифода намоянд.
Иваз намудани шаҳодатномаҳои ронандагии хориҷӣ ба шаҳодатномаи ронандагӣ дар кишвари иқомат аз рӯи категорияҳои “М”, “А”, “B”, “А1”, “B1” пас аз супоридани санҷиши назариявӣ ва пешниҳод намудани маълумотномаи тиббӣ амалӣ гардида, категорияҳои “С”, “D”, “СЕ”, “DЕ” бошад пас аз таҳсил дар курси кутоҳмуддати ронандагӣ, супоридани имтиҳони назариявӣ ва амалӣ ва пешниҳод намудани маълумотномаи тиббӣ иваз карда мешаванд.
Аз ин лиҳоз, Намояндагии Вазорати меҳнат, муҳоҷират ва шуғли аҳолии Ҷумҳурии Ҷумҳурии Тоҷикистон дар Федератсияи Россия ба иттилои шаҳрвандон мерасонад, ки барои гирифтани маълумоти иловагӣ ва маслиҳати ҳуқуқӣ метавонанд ба рақамҳои зерин муроҷиат намоянд. +7(495) 967-98-44 ; +7 (999) 912-58-68 (WhatsApp)
Маркази матуботи Хадамоти муҳоҷират
