Аз 12 то 16 августи соли равон аз ҷониби мутахассисони Маркази захиравии муҳоҷирон дар якҷоягӣ бо кормандони Хадамоти муҳоҷират дар шаҳри Ваҳдат, ноҳияҳои Рӯдакӣ ва Файзобод як қатор чорабиниҳои фаҳмондадиҳӣ оид ба баланд бардоштани сатҳи огоҳии аҳолӣ дар бораи муҳоҷирати бехатар баргузор намуданд.
Ҳадафи асосӣ ин чорабиниҳо огоҳ намудани шаҳрвандон дар бораи ҷанбаҳои муҳими қонунгузории муҳоҷират, пешгирии муҳоҷирати ғайриқонунӣ ва хатарҳои эҳтимолии вобаста ба муҳоҷират мебошад.
Аз ҷониби иштирокдорон 9 семинар ва лексияҳо дар марказҳои ҷамъиятӣ ва муассисаҳои таълимӣ гузаронида шуд.
Ҳамзамон дар вохӯрӣ бо сокинони шаҳру ноҳияҳо маълумоти умумӣ дар бораи муҳоҷирати бехатар, ҳангоми муҳоҷират вохӯрдан бо шахсони фиребгар, ҳуқуқ ва ӯҳдадориҳои муҳоҷирон, ҳамкорӣ бо Хадамоти муҳоҷират, гузаштан аз муоинаи тиббӣ пеш аз муҳоҷират ва ташаккули малакаҳои касбӣ пешниҳод гардид.
Инчунин, дар чорабиниҳо масъалаҳои асосии қонунгузории муҳоҷирати Федератсияи Россия ва тағйироти нав дар қоидаҳо мавриди баррасӣ қарор гирифта, ба иштирокчиён маълумот барои тамос ба Маркази захиравии муҳоҷирон (МЗМ), ки дар бинои Хадамоти муҳоҷират ҷойгир аст, муроҷиат намоянд.
Чорабиниҳои мазкур дар шаҳри Ваҳдат дар Ҷамоати деҳоти Баҳор, Сомониён, Абдулло Абдулвосиев ва Нуъмон Розик, ноҳияи Рӯдакӣ дар дастгоҳи марказии Мақомоти иҷроияи маҳаллии ҳокимияти давлатӣ ва Ҷамоати деҳоти Зайнабобод, Чоргултеппа ва Шаҳраки М. Турсунзода ва ноҳияи Файзобод шахраки Вашгирд ва Деҳоти Баҳор баргузор карда шуд.
Бояд қайд кард, ки дар ин чорабиниҳо зиёда аз 300 нафар сокинони шаҳру ноҳияҳои мазкур иштирок намуданд. Ғайр аз ин, ба иштиркодорон зиёда аз 200 буклетҳо оид ба муҳоҷирати бехатар супорида шуд.
Қайд кардан ба маврид аст, ки чунин чорабиниҳои иттиллоотӣ дар дигар шаҳру ноҳияҳои ҷумҳурӣ баргузор хоҳад гардид.
Маркази матуботи Хадамоти муҳоҷират
