Бо ибтикори бахши Хадамоти муҳоҷират дар ноҳияи Айнӣ дар якҷоягӣ бо намояндаи Кумитаи ҳолатҳои фавқулодда ва мудофиаи граждании ноҳия , бо муҳоҷирони меҳнатии ба ватан бозгашта вохӯрӣ гузаронида шуд.

Дар вохӯри мудири бахши Хадамоти муҳоҷират дар ноҳияи Айнӣ Ғайбуллоев Б., қайд кард, ки дар ҷаҳони имрӯза дар ҳамагуна давлатҳо таҳдиди терроризм ва экстремизм вуҷуд дорад ва пешгирӣ аз ҳамин гуна вабои аср давлатҳои ҷаҳонро водор сохтааст, ки созмонҳову ташкилотҳои гуногунро  таъсис диҳанд.

Ӯ арз намуд, ки дар суханҳои худ доимо Асосгузори сулҳу ваҳдати милли, Пешвои миллат муҳтарам Эмомали Раҳмон қайд менамоянд, ки террорист Ватан, модар, дин, забон надорад ва мақсаду ҳадафи онҳо халалдор намудани ҷомеа ва несту нобуд намудани аҳолии осоишта мебошад.

Инчунин, мавриди зикр аст, ки онҳо бо роҳи фиреб, ваъдаи маблағи барзиёд ва таъмин бо ҷойи кори сердаромад ҷавонон, муҳоҷирони меҳнатӣ ва табақаи аҳолие, ки сатҳи дониш, тафаккур ва ҷаҳонбинии суст доранд ҷалб намуда ҳамагуна ҷиноятҳои вазнинро анҷом медиҳанд.  

Дар сурати гирифтор шудан ба ҳар гуна мушкили ба ҳамагон тавсия дода шуд, ки ба сохторҳои дахлдор муроҷиат намоянд ва ба муҳоҷирони меҳнатие, ки дар хориҷи кишвар фаъолият менамоянд тавсия дода шуд, ки дар ҳолати ру ба ру шудан ба чунин ҳолатҳои номатлуб ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар самти муҳоҷират, Сафорату Консулгариҳои Ҷумҳурии Тоҷикистон дар шаҳрҳои Федератсияи Россия муроҷиат намоянд.      

Бояд қайд кард, ки чунин як чорабинии иттилоотӣ – фаҳмондадиҳӣ бо шаҳрвандон – муҳоҷирони меҳнатӣ ва аъзои оилаи онҳо,  аз ҷониби бахши Хадамоти муҳоҷират дар шаҳри Истиқлол ташкил ва баргузор карда шуд.

Раёсати Хадамоти муҳоҷират дар вилояти Суғд