Бо ташаббуси шуъбаи Хадамоти муҳоҷират дар ноҳияи Ҷайҳун дар якҷоягӣ бо намояндагони Мақомоти иҷроияи ҳокимияти давлатии ноҳия, аз ҷумла, КДАМ, бахши кор бо ҷавонон ва варзиш, раисони маҳаллаҳо ва оилаҳои муҳоҷирони меҳнатӣ чорабинии иттилоотӣ – маърифатӣ баргузор гардид.
Дар рафти чорабинӣ оид ба масъалаҳои пешгирии шомилшавии ҷавонон, алалхусус муҳоҷирони меҳнатӣ ба ҳизбу ҳаракатҳои ифротгаро, одамрабоӣ, зуроварӣ дар оила, муҳоҷирати бехатар ва дигар масъалаҳои мубрами рӯз баррасӣ гардида зикр гардид, ки терроризм ва экстремизм ҳамчун вабои аср ба амнияти ҷаҳон ва ҳар як сокини сайёра таҳдид намуда, барои башарият хатари на камтар аз силоҳи ядроиро ба миён овардааст.
Ҳамзамон баромадкунандагон иброз намуданд, ки рӯз то рӯз терроризм ва экстремизм ба хатари глобалӣ табдил ёфта, ҷаҳони муосирро ба ташвиш овардааст.
Терроризм ва экстремизм – яке аз чунин зуҳуроти номатлуби замони муосир ба шумор рафта, мубориза бар зидди он қарзи ҳар як инсони комил мебошад.
Терроризму экстремизм ҳамчун вабои аср ва дигар ҳодисаҳои номатлуб ба оромию амнияти сайёра ва пойдории давлат таҳдиду хатарҳо эҷод карда, амну осоиш ва ваҳдати халқу миллатҳоро барҳам мезанад.
Ҳол он ки ҳеҷ ҷомеае бидуни таъмини амнияти иҷтимоӣ рушду такомул нахоҳад кард.
Қайд кардан ба маврид аст, ки гузаронидани чунин вохӯриҳо дар дигар ҷамоату деҳоти ноҳияи Ҷайҳун мунтазам баргузор хоҳад шуд.
Раёсати Хадамоти муҳоҷират дар вилояти Хатлон
