Бо ибтикори бахши Хадамоти муҳоҷират дар ноҳияи Айнӣ дар ҳудуди деҳаҳои Ҷамоати деҳоти Фондарё деҳаи Пете ва Пинён бо иштироки намояндагони шуъбаи маориф, кумитаи ҳолатҳои Фавқулодда ва мудофиаи граждании ноҳия вохӯрии судманд бо фаъолони деҳа, омӯзгорон ва раисони хоҷагиҳо баргузор гардид.
Дар вохӯрӣ ба ҳозирин дар бораи «Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025» маълумот пешниҳод гардид.
Зимни баромад мудири бахши Хадамоти муҳоҷират дар ноҳияи Айнӣ Б. Ғайбуллоев қайд кард, ки дар ҷаҳони имрӯза дар ҳамагуна давлатҳо таҳдиди терроризм ва экстремизм вуҷуд дорад ва пешгирӣ аз ҳамин гуна вабои аср давлатҳои ҷаҳонро водор сохтааст, ки созмону ташкилотҳои гуногунро таъсис диҳанд.
Дар суханҳои худ доимо Асосгузори сулҳу ваҳдати миллӣ, Пешвои миллат муҳтарам Эмомалӣ Раҳмон қайд менамоянд, ки террорист, ватан, миллат, дин, забон надорад ва мақсаду ҳадафи онҳо халалдор намудани ҷомеа ва несту нобуд намудани аҳолии осоишта, ходимони давлатӣ ва ғайраҳо мебошад.
Инчунин, мавриди зикр аст, ки онҳо бо роҳи фиреб, ваъдаи маблағи барзиёд ва таъмин бо ҷойи кори сердаромад ҷавонон, бахусус муҳоҷирони меҳнатӣ ва табақаи аҳолие, ки сатҳи дониш, тафаккур ва ҷаҳонбинии суст доранд ҷалб намуда, ҳамагуна ҷиноятҳои вазнинро анҷом медиҳанд.
Барои эмин доштани худ аз доми гурӯҳҳои террористӣ ва экстремистӣ ҷавонон, муҳоҷирони меҳнатӣ ва дигар табақаи ҷомеаи аҳолӣ бояд аз вожаҳои терроризм, экстремизм ё террорист кист? Кадом гуруҳҳои ифротӣ мавҷуданд маълумот дошта бошанд.
Ҳангоми муҳоҷират дар хориҷа ба ҳар гуна шахсони алоҳидаи ношинос ва шубҳанок, ки маблағи зиёдро ваъда дода, бо ҳар роҳ дили онҳоро гарм намуда ба гурӯҳҳо ҳамроҳ менамоянд, бовар накарда, аз онҳо дурӣ ҷуянд.
Дар шабакаҳои иҷтимоӣ, ки аз тарафи шахсони ба онҳо ношинос паёмакҳои шубҳанок ворид мешаванд ҷавоб надиҳанд ва ба наворҳои видеоии хусусияти экстремистӣ дошта ба истилоҳ лайк (like) нагузоранд.
Ҳамзамон ба самъи аҳолии ноҳия ва ҷамъомадагон ҷиҳати пайдо намудани ҷои кори қонунӣ ба хориҷи кишвар пешниҳодҳо дода шуд ва ба ҳамаи онҳо аз ҷониби бахш буклетҳо доир ба таъмини ҷойи кории холӣ дар хориҷи кишвар тақсим карда шуд.
Дар сурати гирифтор шудан ба ҳар гуна мушкилӣ ба ҳамагон тавсия дода шуд, ки ба сохторҳои дахлдор муроҷиат намоянд ва ба муҳоҷирони меҳнатие, ки дар хориҷи кишвар фаъолият менамоянд тавсия дода шуд, ки дар ҳолати ру ба ру шудан ба чунин ҳолатҳои номатлуб ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия, Сафорат ва Консулгариҳои Ҷумҳурии Тоҷикистон дар Федератсияи Россия муроҷиат намоянд.
Бахши Хадамоти муҳоҷират дар ноҳяи Айнӣ
