Бо мақсади иҷрои супориши Роҳбарияти Вазорати муҳнат, муҳоҷират ва шуғли аҳолии Ҷумҳурии Тоҷикистон, муовини якуми Сардори Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон Шарифзода Маҳмадсалим Пир бо сафари корӣ дар ноҳияи Зафаробод қарор доранд.Зимни сафар номбурда ба як қатор ҷамоату маҳаллаҳои ноҳияи Зафаробод (дар Ҷамоати деҳоти Ҷомӣ, маҳаллаҳои Бурон Шамсиев, Абӯабдуллоҳи Рӯдакӣ, деҳаи Бахт маҳалаи ба номи Ҷӯра Зарипов ва Наврӯз ) рафта бо фаъолон, муҳоҷирони ба ватан бозгашта ва аъзои оилаи онҳо вохӯриҳои судманд ба роҳ монд.
Дар рафти суҳбат муовини якуми Сардори Хадамоти муҳоҷират Шарифзода М.П., ба шаҳрвандон доир ба навовариҳои қонунҳои амалкунандаи Федератсияи Россия суханронӣ намуда, қайд кард, ки шурӯъ аз 1 январи 2025 Қоидаи 90/365 амали худро оғоз намудааст, дар асоси ин Қарори 90/180 амал карда шуд ва муҳлати 180 шабонарӯз ба 365, яъне соли тақвимӣ иваз карда шудааст.Мутобиқи ин Қоида ҳар як шаҳрванди хориҷие, ки пас аз 1 январи соли 2025 ба Федератсияи Россия бе раводид ворид мешавад ва Патент ё Иҷозат барои истиқомати муваққатӣ (РВП) ё иҷозати доимӣ (ВНҶ ) ба даст намеорад, метавонад аз рӯзи воридшавӣ ба Федератсияи Россия дар муддати соли тақвимӣ танҳо 90 шабонарӯз будубош намояд. Пеш аз ба итмом расидани 90 шабонарӯз шаҳрванди хориҷӣ ҳатман бояд убури сарҳад намояд ва то ба охир расидани соли тақвимӣ, яъне 31 декабр ҳуқуқи дубора ба Федератсияи Россия ворид шуданро надорад.
Ҳамзамон, Шарифзода Маҳмадсалим Пир ба шаҳрвандони ноҳия, ки барои фаъолияти меҳнатӣ ба кишварҳои хориҷа, аз ҷумла Федератсияи Россия сафар мекунанд, ба онҳо дар бораи тартиби дароз намудан ва ё кам намудани муҳлати будубоши шаҳрвандони хориҷӣ ва шахсони бешаҳрванд дар Федератсияи Россия, ба расмият даровардани ҳуҷҷатҳо, гирифтани Патент, қайди муваққатӣ, бастани шартнома бо кордиҳанда ва дигар масъалаҳои мубрами рӯз, ироа намуд.Инчунин, иштирокдоронро оид ба иҷроиши Фармони Президенти Федератсияи Россия аз 28 апрели соли 2025, таҳти №272 “Оиди ворид намудани тағйироту илова ба Фармони Президенти Федератсияи Россия аз 30 декабри соли 2024, № 1126”, муҳлати қонунигардонӣ дар Федератсияи Россия то 10 сентябри соли 2025 тамдид карда шудааст, шинос намуд.
Гуфта шудааст, ки шаҳрвандони Ҷумҳурии Тоҷикистон, ки дар қаламрави Федератсияи Россия бе ҳуҷҷати расмӣ қарор доранд, имконият доранд, ки то санаи 10 сентябри соли 2025 ҳуҷҷатҳои худро ба расмият дароранд. Дар ҳолати пайдо гардидани саволҳо дар ин самт метавонанд ба масъулини Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ФР дар самти муҳоҷират муроҷиат намоянд.
Ҳамзамон, муовини якуми Сардори Хадамоти муҳоҷират дар вохӯрӣ оид ба хатару таҳдидҳои замони муосир, пешгирӣ аз шомилшавӣ ба ҳизбу ҳаракатҳои иртиҷоӣ, гурӯҳҳои террористиву экстремистӣ, Қонуни Ҷумҳурии Тоҷикистон «Дар бораи тарбияи ватандӯстии шаҳрвандон» ва дигар қонунҳои амалкунанда иброз намуда, таъкид намуд, ки ҷавонони мо бояд ҳисси баланди миллӣ дошта башанд, бо Ватан, миллат, давлати соҳибистиқлоли худ ва забону фарҳанги миллии хеш ифтихор намоянд ва барои ҳимояи он ҳамеша омода ва ҳушёру зирак бошанд.
Баргузории чунин вохӯриҳо бо сокинон дар дигар Ҷамоату шаҳраки ноҳия идома хоҳад ёфт.
Раёсати Хадамоти муҳоҷират дар вилояти Суғд
