Имрӯз, 18 октябри соли равон дар маҷлисгоҳи Хадамоти муҳоҷират ҳамоиш дар мавзуи “Мероси фарҳангии миллӣ – кафили саодати рӯзгори таърихии мост” баргузор гардид.
Дар ҳамоиш намояндаи Кумитаи иҷроияи ҲХДТ дар шаҳри Душанбе Шамсов Саймуддин, омӯзгори Донишгоҳи давлатии омӯзгории Тоҷикистон ба номи С. Айнӣ Маҳмудов Давлатшоҳ, муовини якуми Сардори Хадамоти муҳоҷират Шарифзода Маҳмадсалим Пир ва кормандони Хадамоти муҳоҷират иштирок намуданд.
Зимни баромад намояндаи КИ ҲХДТ дар шаҳри Душанбе Шамсов Саймуддин қайд намуданд, ки дар замони Истиқлол бо азму талошҳои Асосгузори сулҳу Ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон фарҳанги миллӣ тадриҷан эҳё гардида, рушд намуд.
Дар замони Истиқлол “Конспесияи инкишофи фарҳанг” ва Қонуни Ҷумҳурии Тоҷикистон “Дар бораи фарҳанг” қабул гардиданд, ки барои рушди минбаъдаи фарҳанги миллӣ заминаи боэътимод ба вуҷуд оварданд.
Сипас, дар назди ҳозирин омӯзгори Донишгоҳи давлатии омӯзгории Тоҷикистон ба номи С. Айнӣ Маҳмудов Давлатшоҳ баромад намуда иброз доштанд, ки Ҳукумати Ҷумҳурии Тоҷикистон барои ташаккул ва тақвияти худогоҳию худшиносии миллӣ ва дар ин замина таҳким бахшидан ба ҳамгироии минтақаҳо ва ваҳдати миллӣ корҳои зиёдеро анҷом дод.
Аз ҷумла, барои эҳё ва тақвияти фарҳанги миллӣ, инчунин бо мақсади ваҳдату ягонагии халқамон дар кишвар якчанд ҷашнҳои умумимиллӣ: – 1000 –умин солгарди иншои “Шоҳнома”-и безаволи Фирдавсӣ, таҷлили 1100-солагии Давлати Сомониён, ҷашни 2500-солагии Истаравшан, таҷлили 2700-солагии шаҳри бостонии Кӯлоб, таҷлили 3000-солагии Ҳисор, ҷашни 5500-солагии шаҳри Саразм, 2700-солагии нахуст китоби аҳли башар – “Авесто”, ҷашни бузургдошти алломаҳои фарҳанги миллӣ – Мир Саид Алии Ҳамадонӣ, Камоли Хуҷандӣ, Умари Хайём, таҷлили ҳамасолаи “Рӯзи Рӯдакӣ” ва ғайра гузаронида шуданд, ки дар баргузории ҳамаи чорабиниҳои сиёсӣ – фарҳангии зикршуда саҳми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон хеле бузург аст.
Рӯй овардан ба таърихи халқи хеш, иншо ва чопи китоби “Тоҷикон” – и аллома Бобоҷон Ғафуров ва ҳадяи он ба мардуми кишвар, худ гувоҳи эҳё намудани таърих ва фарҳанги миллӣ аз тарафи Пешвои миллат, Президенти муҳтарами кишварамон Эмомалӣ Раҳмон мебошад.
Маҳз бо ибтикори Пешвои муаззами миллат муассисаҳои муҳташами фарҳангӣ, аз қабили Китобхонаи миллии Тоҷикистон, осорхонаи миллии Тоҷикистон мавриди истифода қарор гирифтанд.
Бо талошҳои пайвастаи Сарвари давлат оину ҷашнҳои миллӣ, назири Наврӯз, Меҳргон, Шашмақом, Фалак, атласу адрас ва чакан эҳё гардида, қисме аз арзишҳои фарҳангӣ, мисли Шашмақом ва Наврӯз ба Феҳристи мероси ЮНЕСКО ва шаҳри қадимаи Саразм ба Феҳристи мероси моддии созмони фавқуззир ворид шуданд.
Бо иқдоми Сарвари давлат соли 2019 мусиқии Фалак, ёдгории таърихии Ҳулбук ва ҷашнҳои Меҳргону Сада низ барои ворид шудан ба ин созмони бонуфузи банйалмилалӣ пешниҳод гаштанд.
Дар фарҷоми ҳамоиш барои дарки баланди масъулият дар амалӣ гардонидани сиёсати хирадмандонаи Асосгузори сулҳу ваҳдати миллӣ – Пешвои миллат, раиси муаззами фаъолияти пурсамарашон ҲХДТ муҳтарам Эмомалӣ Раҳмон бахшида ба 30 – солагии таъсисёбии Ҳизби Халқи Демократии Тоҷикистон аз ҷониби Кумитаи иҷрояи ҲХДТ дар шаҳри Душанбе ба Сардори Хадамоти муҳоҷират Нодирзода Иматшо “Ифтихорнома”, муовини якуми Сардори Хадамоти муҳоҷират Шарифзода Маҳмадсалим Пир ва омӯзгори Донишгоҳи давлатии омӯзгории Тоҷикистон ба номи С. Айнӣ Маҳмудов Давлатшоҳ бо “Сипоснома” қадрдонӣ гардиданд.
Маркази матбуоти Хадамоти муҳоҷират
