Бахшида ба Соли маърифати ҳуқуқӣ барои баланд бардоштани маърифати ҳуқуқии қишрҳои гуногуни ҷомеа ва аз байн бурдани зуҳуроти халалдоркунандаи манфиатҳои давлату миллат мулоқоти судманд бо сокинони ноҳияи Абдураҳмони Ҷомӣ баргузор гардид.
Дар рафти мулоқот иброз гардид, ки имрӯзҳо бо дастгирии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бахшида ба ҷашни 35-солагии Истиқлолияти давлатии Ҷумҳурии Тоҷикистон дар тамоми минтақаҳои мамлакат, аз ҷумла шаҳру ноҳияҳои вилояти Хатлон раванди корҳои ободонию созандагӣ бомаром идома дорад.
Дар баробари ин якчанд лоиҳаҳои бузурги инвеститсионӣ дар ҳоли амалишавӣ қарор доранд, ки имкони бо шуғли мавсимӣ фаро гирифтани ҷавонони бекорро доранд.
Бо назардошти ин имконият дар вохӯрӣ масълаҳои бо кору шуғл таъмин намудани ҷавонон, ҷалби бештари онҳо ба касбу ҳунаромӯзӣ, тарғиби тарзи ҳаёти солим, инчунин дар масъалаҳои пешгирии ҷинояткорӣ ва ҳамроҳшавии сокинон ба ҳизбу ҳаракатҳои ифротӣ мавриди баррасӣ қарор гирифт.
Таъкид гардид, ки мақомоти марбутаи давлатӣ барои ҳал кардани мушкилӣ ва дархостҳои ҷавонон омода буда, баҳри татбиқи барномаҳои давлатӣ дар соҳаи дастгирии ҷавонон тамоми чораҳои заруриро таҳия ва амалӣ менамояд.
Аз иштирокдорони вохӯрӣ тақозо карда шуд, ки дар тарбияи наврасону ҷавонон дар руҳияи худогоҳию худшиносии миллӣ, арҷгузорӣ ба таъриху фарҳанги пурғановати миллати тоҷик, мубориза бар зидди таҳдиду хатарҳои ҷаҳони муосир, хурофотпарастӣ, ифротишавии мафкураи насли наврас ва пешгирии ҳама гуна зуҳуроти халалдоркунандаи тартиботу оромӣ саҳм гузоранд.
РаёсатиХадамоти муҳоҷират дар вилояти Хатлон
