Бо ташаббуси шуъбаи Хадамоти муҳоҷират дар шаҳри Хуҷанд бахшида ба Соли маърифати ҳуқуқӣ эълон гардидани соли 2024 дар байни раисони маҳаллаҳои шаҳри Хуҷанд вобаста ба татбиқи «Стратегияи муқовимат ба экстремизму терроризм дар Ҷумҳурии Тоҷикистон барои солҳои 2021-2025» вохӯрии судманд баргузор шуд.
Дар ҳамоиш сардори шуъбаи Хадамоти муҳоҷират дар шаҳри Хуҷанд оиди дар амал иҷро намудани нақшаи чорабиниҳои Стратегияи муқовимат ба терроризм ва экстремизм, амалӣ намудани қонунҳои миллӣ ва татбиқи сиёсати давлатӣ, пош нахӯрдани оилаҳои ҷавон, баланд бардоштани ҳисси ватандӯстии ҷавонон ва ҷалби онҳо ба сафи Артиши миллӣ сухан гуфт.
Аз ҷумла иброз намуд, ки тарбияи ҳарбӣ-ватандӯстӣ, тарғиби фарҳанги миллӣ ва пешгирии майли бегонапарастӣ, муборизаи идеологӣ бар зидди терроризм, экстремизм ва амсоли инҳо аз самтҳои аввалиндараҷаи тарбияи насли ҷавон ба шумор рафта, омӯзгорон ва падару модарон, собиқадорону фаъолон бояд насли ҷавонро дар руҳияи ватандӯстию хештаншиносӣ тарбия намоянд.
Мутаассифона, имрӯзҳо шабакаҳои иҷтимоӣ яке аз роҳҳо ва омилҳои ҷалби ҷавонон ба гурӯҳҳои ифротӣ гардидаанд. Дар ин самт фаъолони гурӯҳҳои ифротӣ дар шабакаҳои иҷтимоӣ мавод ва маълумотро интихобан нашр менамоянд, то ба ин васила мағзи ҷавононро шуста, фикри онҳоро нисбат ба волидайн, ҷомеа, давлат ва инсоният тағйир диҳанд. Аз ин рӯ волидайни наврасону ҷавонон бояд тарзи истифодаи дурусти телефонҳои мобилӣ ва шабакаҳои иҷтимоиро ба фарзандонашон ёд диҳанд ва онҳоро мунтазам назорат кунанд.
Ҳамзамон гуфта шуд, ки мубориза бар зидди ҷинояткорӣ ва пешгирии ҳамроҳшавии ноболиғон ва ҷавонон ба гурӯҳҳои ифротӣ вазифаи дастҷамъонаи тамоми шаҳрвандони мамлакат ба шумор меравад. Бетарафӣ нисбат ба ин зуҳуроти номатлуб хиёнат ба оила ва Ватан – Модар мебошад. Чунки ин омилҳои номатлуб ба рушди минбаъдаи давлат халали ҷиддӣ ворид намуда, ба ваҳдати миллӣ, истиқлолияти давлатӣ ва бехатарии мамлакат таҳдид менамоянд.
Чунин вохӯриҳои судманд бо ҷалби сокинони маҳаллаҳои шаҳр, ҷавонону наврасон ва хонандагону донишҷӯёни муассисаҳои миёнаи касбии вилоят идома меёбад.
Шуъбаи Хадамоти муҳоҷират дар шаҳри Хуҷанд
