Бо ташаббуси роҳбарияти МД“Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Душанбе дарси идоравӣ бо кормандони “Маркази машваратӣ ва омодагӣ пеш аз сафари муҳоҷирони меҳнатӣ” дар шаҳри Хоруғ баргузор гардид.
Мақсад аз баргузории дарси идоравӣ, – иброз намуд директори МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе Хуҷаназар Акбаров, – ин сайқал додани дониш ва малакаи кормандони Марказ мебошад. Аз ҷумла, ҷоннок намудани корҳои иттилоотӣ-маърифатӣ ҳангоми сафарбаркунии шаҳрвандон барои корҳои мавсимии кишоварзӣ ба Британияи Кабир дар доираи ҳамкориҳо бо ширкатҳои «Pro-Force» ва HOPS Labour Solutions Ltd, ки хостори фаъолияти муваққатии меҳнатӣ дар соҳаи кишоварзии Британияи Кабир мебошанд. Ӯ қайд кард, ки бо иштироки намояндагони ширкатҳои мазкур бо шаҳрвандон кормандони Марказҳо суҳбатҳо баргузор намуда, баъди интихоби онҳо аз ҷониби ширкатҳо марҳила ба марҳила ба Британияи Кабир фиристода мешаванд.
Ҳамзамон Х. Акбаров арз намуд, ки ҳамкории ширкатҳои «Pro-Force» ва HOPS Labour Solutions Ltd бо МД «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе, ки муассисаи давлатӣ аст, хуб ба роҳ монда шудааст. Тибқи тартиб, чунин хизматрасониҳо комилан ройгон буда, аз шаҳрвандон маблағ талаб карда намешавад.
Инчунин, ба кормандони “Маркази машваратӣ ва омодагӣ пеш аз сафари муҳоҷирони меҳнатӣ” дар шаҳри Хоруғ барои тавсеаи ҳамкориҳо ва таъмини бештари шаҳрвандон бо ҷои кор дар хориҷи кишвар ва ҷалби муташаккилонаи онҳо барои амалисозии фаъолияти муваққатии меҳнатӣ дар хориҷа муроҷиат мекунанд, барои шиносоӣ бо шароити кор ва мусоҳиба бо корфармоён аз ширкатҳои мазкур ибрози андеша намуд.
Бояд тазаккур дод, ки аз имкониятҳои рушди ҳамкорӣ бо Британияи Кабир дар самти бо кор таъминкунии шаҳрвандон ёдовар шуда, даъват ба амал оварда шуд, ки зимни пайдоиши саволҳои иловагӣ, ё арзу дархостҳо шаҳрвандон метавонанд тариқи ҳузурӣ ё телефонӣ ба шуъбаи Хадамоти муҳоҷират дар ВМКБ муроҷиат намоянд.
Дар феҳрасти талабот аз муҳоҷирон донистани забони англисӣ дар сатҳи муошират зикр шудааст. Директори Марказ Хуҷаназар Акбаров муҳлати сафарро то 6 моҳ гуфта, илова намуд, ки хароҷоти сафар аз сӯи худи муҳоҷирон пардохт мегардад, – афзуд ӯ.
Гузаронидани чунин дарси идоравӣ аз ҷониби роҳбарияти МД «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе бо Марказҳои машваратӣ дар вилояти Суғду Хатлон дар назар аст.
Маркази матбуоти Хадамоти муҳоҷират
