Коррупсия яке аз зуҳуроти номатлуб ва барои ҷомеа хатарафзо мебошад, ки мубориза бо он вазифаи муҳимми мақомоти давлатӣ, ниҳодҳои ҷомеаи шаҳрвандӣ ва ҳар як сокини мамлакат ба шумор меравад. Тавре ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид менамоянд, мубориза бо коррупсия бояд пайваста, дастаҷамъона ва бомасъулият сурат гирад.
Коррупсия яке аз падидаҳои қадимӣ дар низоми муносибатҳои иҷтимоӣ буда, тӯли таърих шаклҳои худро тағйир дода, дар замони муосир хусусиятҳои нав гирифтааст. Имрӯз ин мушкилот ба монеаи ҷиддии рушди иқтисодиву иҷтимоӣ ва сиёсиву ҳуқуқии давлатҳо табдил ёфта, ҷомеаи ҷаҳониро водор месозад, ки зидди он чораҳои мушаххас андешад.
Ҷумҳурии Тоҷикистон низ ҳамчун узви фаъоли ҷомеаи ҷаҳонӣ 25 сентябри соли 2006 ба Конвенсияи Созмони Милали Муттаҳид зидди коррупсия ҳамроҳ шуда, уҳдадориҳои байналмилалии худро дар ин самт ба низоми ҳуқуқии кишвар ворид кардааст.
Дар доираи сиёсати давлатии муқовимат ба коррупсия, як қатор стратегияҳои муҳими зиддикоррупсионӣ амалӣ шудаанд, аз ҷумла: “Стратегияи мубориза бо коррупсия барои солҳои 2008–2012”, “Стратегияи муқовимат ба коррупсия барои солҳои 2013–2020” ва “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030”, ки бо Фармони Президенти Ҷумҳурии Тоҷикистон аз 3 августи соли 2021 тасдиқ гардидааст.
Соли 2026 татбиқи амалии марҳилаи навбатии Стратегияи мазкур идома дорад. Мақсад аз қабули ин Стратегия баланд бардоштани маърифати зиддикоррупсионии аҳолӣ, фароҳам овардани муҳити тоқатнопазирӣ нисбат ба амалҳои коррупсионӣ ва бартараф намудани омилҳои он мебошад.
Муътақидем, ки танҳо тавассути баланд бардоштани маърифати ҳуқуқии шаҳрвандон, тарбияи ҳисси ватандӯстӣ, содиқ будан ба арзишҳои миллӣ ва рушди тафаккури зиддикоррупсионӣ дар ҷомеа метавон ба ҳадафҳои ниҳоӣ – коҳиши шиддати коррупсия ва таҳкими адолат дар ҷомеа ноил гардид.
Мубориза бо коррупсия вазифаи ҳар як шаҳрванди худогоҳу худшинос буда, татбиқи самараноки сиёсати зиддикоррупсионӣ танҳо дар ҳамбастагӣ ва бо иштироки фаъолонаи ҷомеа имконпазир аст.
Урунбоев Б, Мудири бахши Хадамоти муҳоҷират дар ноҳияи Спитамен
