Имрӯзҳо тамоми фаъолияти кормандони Шуъбаи баҳисобгирӣ ва хизматрасонӣ ба муҳоҷирон дар КВД «Истгоҳи роҳи оҳани шаҳри Душанбе»-и Раёсати Хадамоти муҳоҷират дар шаҳри Душанбе ба корҳои фаҳмондадиҳӣ доир ба тағйироту иловаҳое, ки ба қонунгузории Федератсияи Россия оид ба муҳоҷират ва будубоши шаҳрвандони хориҷӣ дароварда шудаанд, равона гардидааст.
Кормандони Шуъба бо мақсади беҳтар ва амиқтар фаҳмонда додани навгониҳои қонунгузории Федератсияи Россия, ҳамарӯза дар “Истгоҳи роҳи оҳани шаҳри Душанбе” нақша – чорабиниҳои Хадамоти муҳоҷиратро таҳия намуда онро давра ба давра амалӣ гардонида истодааст. Диққати асосӣ бурдани корҳои иттилоотӣ-маърифатӣ дар байни ҷавонон мебошад, чунки нисфи зиёди шаҳрвандоне, ки нияти сафар кардан ба кишвари Россия тавассути қатора доранд, ҷавонон ташкил медиҳад. Зимни вохӯриҳо бо шаҳрвандони мамлакат-муҳоҷирони меҳнатӣ доир ба тартиботи нав ҷорӣ гардида оид ба самти муҳоҷират дар Федератсияи Россияро муфассал шарҳ медиҳанд.
Диққати асосӣ ба он равона мегардад, ки минбаъд муҳоҷирони меҳнатие, ки нияти кор кардан дар Федератсияи Россия доранд, бояд роҷеъ ба забони русӣ, асосхои конунгузорӣ ва таърихи Россия дониши кофӣ дошта бошанд, чунки дар баробари дигар ҳуҷҷатҳо оид ба гирифтани патент, ҳар як муҳоҷири меҳнатӣ бояд Сертификат оид ба донистани забон, таърих ва асосҳои қонунгузории Россияро пешниҳод намояд. Ҳамзамон ба ҷавонон оид ба тарзи пур кардани ҳуҷҷатҳои лозима дар фурудгоҳ ва истогҳи роҳи оҳан, муҳлати берункарда шуда (депортатсия), донистани ҳуқуқ ва манфиатҳои худ, гузаштан аз муоинаи тиббӣ ва дигар масъалаҳои муҳими тартиботи сафар ба мамлакатҳои хориҷа маълумоти муфассал дода мешавад.
Дар рафти вохӯрӣ кормандони Шуъба ба саволҳои шаҳрвандон оид ба тартиби дарёфт намудани кор аз рӯи ихтисос, робита бо Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар субъектҳои Федератсияи Россия оид ба муҳоҷират, эътибори шаҳодатномаҳо ва дипломҳои муассисаҳои таълимии Ҷумҳурии Тоҷикистон дар ин мамлакат, намуди маълумотномаҳои тиббӣ ва дигар масъалаҳои барои муҳоҷирон муҳим чавобҳои мушаххас доданд.
Шуъбаи баҳисобгирӣ ва хизматрасонӣ ба муҳоҷирон дар ҶСК «Фурудгоҳи байналмилалии Душанбе» ва КВД «Истгоҳи роҳи оҳани шаҳри Душанбе»-и Раёсати Хадамоти муҳоҷират дар шаҳри Душанбе
