Бо ибтикори Хадамоти муҳоҷират бо иштироки кормандони Саридораи ҳифзи сирри давлатии назди Ҳукумати Ҷумҳурии Тоҷикистон дар доираи Нақшаи чорабиниҳои амалисозии Барномаи давлатии таҳкими ҳифзи сирри давлатӣ ва ҳифзи техникии иттилоот дар Ҷумҳурии Тоҷикистон барои солҳои 2022 – 2026, ки бо қарори Ҳукумати Ҷумҳурии Тоҷикистон аз 29 июли соли 2022, №377 тасдиқ гардидааст, 24 июни соли равон бо иштироки кормандони дастгоҳи марказии Хадамоти муҳоҷират ва МД “Марказҳои машваратӣ ва омодагӣ пеш аз сафари муҳоҷирони меҳнатӣ” хониши идоравӣ дар мавзӯи “Ҳифзи сирри давлатӣ” баргузор гардид.
Дар хониши идоравӣ намояндагони Саридораи ҳифзи сирри давлатии назди Ҳукумати Ҷумҳурии Тоҷикистон Қодирзода Юсуф Раҳим муовини сардори Раёсати назорати реҷаи махфият ва Аминзода Дилноза мутахассиси пешбари Раёсати ташкили коргузорӣ, назорат ва кор бо кадрҳои Саридора, иштирок ва суханронӣ намуданд.
Дар оғози чорабинӣ муовини якуми Сардори Хадамоти муҳоҷират Шарифзода Маҳмадсалим Пир меҳмононро ба иштирокдорон муаррифӣ намуда, суханро барои иттилоот ба Қодирзода Юсуф Раҳим дод. Номбурда роҷеъ ба масъалаҳои муҳими соҳа ибрози назар карда, зикр дошт, ки бо таваҷҷуҳи хоса ба ин самти муҳими давлатдорӣ бо мақсади баланд бардоштани савияи касбӣ, рушди донишҳои соҳавӣ ва баратараф намудани камбудиҳои ҷойдошта дар фаъолияти масъулони дахлдори вазорату идораҳои кишвар чунин чорабиниҳои омӯзишӣ аз ҷониби Саридора роҳандозӣ карда мешаванд.
Ҳамзамон, Қодирзода Юсуф Раҳим мухтассар дар бораи Қонуни Ҷумҳурии Тоҷикистон дар бораи сирри давлатӣ асосҳои ҳуқуқӣ ва системаи ҳифзи сирри давлатиро ба манфиати таъмини амнияти миллии Ҷумҳурии Тоҷикистон муайян карда, муносибатҳои ҷамъиятиро вобаста ба мансуб донистани маълумот ба сирри давлатӣ, махфигардонӣ, ихтиёрдорӣ, ҳифз ва ғайримахфигардонии онҳо танзим менамояд, ба иштирокдорон маълумот дод.
Аз ҷумла, қайд карданд, ки мақомоти ҳифзи сирри давлатӣ мувофиқи вазифаҳои ба зиммаи онҳо гузошташуда ва дар доираи салоҳияти худ ҳифзи маълумоти дорои сирри давлатиро таъмин менамоянд. Масъулияти ташкили ҳифзи маълумоти дорои сирри давлатӣ дар мақомоти давлатӣ ва ташкилотҳо ба зиммаи роҳбарони аввали онҳо вогузор мегардад. Вобаста ба ҳаҷми кор бо истифодаи маълумоти дорои сирри давлатӣ аз тарафи роҳбарони мақомоти давлатӣ ва ташкилотҳо, воҳидҳои сохторӣ оид ба ҳифзи сирри давлатӣ таъсис дода мешаванд, ки функсияҳои онҳо аз тарафи роҳбарони мазкур бо дарназардошти хусусияти корҳои гузаронидашавандаи онҳо муайян карда мешаванд. (ҚҶТ аз 02.01.20 с., №1664)
Инчунин, ҳифзи сирри давлатӣ яке аз намудҳои фаъолияти асосии мақоми давлатӣ ва ташкилот ба ҳисоб меравад, – иброз намуд Қодирзода. Дар идома иштирокдорон вобаста ба мавзуъҳои дахлдор ва дар доираи фаъолияти кории худ суолҳо пешниҳод намуда, ҷавобҳои мушаххас гирифтанд.
Маркази матбуоти Хадамоти муҳоҷират
