Санаи 3 июни соли равон, дар Хадамоти муҳоҷират хониши идоравӣ дар мавзуи Қонуни Ҷумҳурии Тоҷикистон “Дар бораи забони давлатӣ”, бо иштироки мудири шуъбаи таълим ва корҳои методии МД “Маркази ҷумҳуриявии дарёфт ва рушди истеъдодҳо” Сафарова Зевар, баргузор гардид. Дар он кормандони дастгоҳи марказии Хадамот ва МД “Марказҳои машваратӣ ва омодагӣ пеш аз сафари муҳоҷирони меҳнатӣ” иштирок намуданд. Муовини якуми Сардори Хадамоти муҳоҷират Шарифзода Маҳмадсалим Пир вохӯриро оғоз намуда, қайд намуданд, ки Хадамоти муҳоҷират аз ҳамкориҳои мутақобилаи судманд бо МД “Маркази ҷумҳуриявии дарёфт ва рушди истеъдодҳо”, қаноатманд буда ба Сафарова Зевар аз номи Сардори Хадамоти муҳоҷират ва кормандон барои иштирокашон изҳори миннатдорӣ баён намуданд.
Дар рафти хониши идоравӣ Сафарова Зевар иброз намуданд, ки яке аз муқаддасоте, ки муаррифгари миллат ҳасту моро бо ҷаҳониён мепайвандад, ин забон мебошад. Аз санаи қабул гардидани Қонун “Дар бораи забони давлатӣ” сол то сол мавқеъ ва нуфузи он афзун гардида, ҷиҳати рушду инкишоф ва татбиқи муқаррароти Қонуни Ҷумҳурии Тоҷикистон “Дар бораи забони давлатии Ҷумҳурии Тоҷикистон” ва ҷиҳати пешгирии вайрон кардани он чораҳои зарурӣ андешида мешавад. Зеро забон яке аз рукнҳои асосии давлату давлатдорӣ ба ҳисоб рафта, нишони ҳастии миллату давлат шинохта шудаааст.
Қайд кардан ба маврид аст, ки Асосгузори сулҳу ваҳдати миллӣ-Пешвои миллат Президенти Ҷумҳурии Тоҷикистон муҳтарам Эмомалӣ Раҳмон аз минбари баланди СММ бо забони ноби тоҷикӣ сухан мегӯянд. Ин аллакай гувоҳи он аст, ки ҷаҳон ин забонро эътироф кардааст.
Имрӯз забони тоҷикӣ ба ҳайси забони миллӣ ва давлатӣ дар мақоми забони сиёсат, илму фарҳанг, қонунгузорӣ, равобити дипломатӣ, тиҷорат ва дигар воситаҳои иртибот қарор дорад. Муҳимтар аз ҳама имрӯз забони давлатӣ дар кишвари азизамон ба рамзи ҳамбастагӣ ва иттиҳоди воқеии тамоми сокинони Тоҷикистон мубаддал гардидааст. Инкишофу рушди забон нишондиҳандаи пешрафти миллат ва давлат аст. Ба ин маънӣ дар даврони истиқлоли кишварамон доираи истифодаи забони давлатӣ чӣ дар корҳои давлатдорӣ ва чӣ дар арсаҳои сиёсиву иқтисодӣ ва иҷтимоиву фарҳангӣ вусъати бесобиқа ёфт, -афзуд Сафарова З. Хониши идоравӣ бо саволу ҷавоб анҷом ёфт
Маркази матбуоти Хадамоти муҳоҷират
