Бо ташаббуси шуъбаи Хадамоти муҳоҷират дар ВМКБ дар шаҳри Хоруғ мизи мудаввар дар мавзуи “Муҳоҷирати бехатар ва муқовимат ба савдои одамон” бо иштироки кормандони сохторҳои Вазорати меҳнат, муҳоҷират ва шуғли аҳолии Ҷумҳурии Тоҷикистон дар ВМКБ баргузор гардид.

Дар ҷараёни кори ҷаласа аз тарафи иштирокчиён қайд карда шуд, ки масъалаи савдои одамон дар шароити имрӯза падидаи номатлуб дар тамоми ҷаҳон буда, ба ҳаёти иҷтимоии ҷомеаи ҷаҳон зарари ниҳоят калон расонида истодааст. Таҳлилҳо нишон медиҳанд, ки мутаассифона дар ҷаҳон болоравии сатҳи фурӯши одамон боло рафта, дар қатори дигар ҷиноятҳои байналмилалӣ дар ҷойҳои аввал меистад.

Қисми зиёди ин тиҷорати ғайриқонуниву ғайриинсонӣ дар дасти ташкилотҳои ҷиноятӣ қарор дорад ва тибқи ҳисоботи Созмони Милали Муттаҳид ҳамасола беш аз 4 миллион нафар одамон дар саросари ҷаҳон барои иҷрои корҳои маҷбурӣ аз сарҳадоти кишварҳои дигар гузаронида шуда, ин кор ба синдикатҳои ҷиноятпеша соле то 7 миллиард доллари амрикоӣ даромади ғайриқонунӣ меорад. Савдои одамон падидаи иртиҷоӣ бисёрҷабҳа ва хеле мураккаб буда, ба муносибатҳои гуногуни ҳаёти ҷомеа иртибот дорад.

Аз ин лиҳоз, вазифаи ҳар як шаҳрванди Ҷумҳурии Тоҷикистон, хусусан кормандони Вазорати меҳнат, муҳоҷират ва шуғли аҳолии Ҷумҳурии Тоҷикистон дар ВМКБ дар он мебошад, ки ҳар як шаҳрванде, ки хоҳиши сафар кардан ба муҳоҷирати меҳнатӣ дорад, бояд бо омодагии ҷиддӣ, яъне донистани забони давлати муҳоҷирпазир, талаботи қонунгузориҳои амалкунандаи ин давлатҳо вобаста ба муҳоҷирати меҳнатӣ, донистани таъриху фарҳанг ва соҳибкасб буданро бинад, то ин ки ба дасти шахсони ҷиноятпеша наафтад ва ба корҳои нопок равона карда нашавад.

Дар фарҷом иштирокчиёни мизи мудаввар ба хулосае омаданд, ки вақти он аст, ки бо шаҳрвандон корҳои фаҳмондадиҳиро вобаста ба ҳамаи масъалаҳои мубрами рӯз, аз ҷумла муҳоҷирати бехатар ҷиддӣ ба роҳ монанд.

Шуъбаи Хадамоти муҳоҷират дар ВМКБ