Бо ибтикори бахши Хадамоти муҳоҷират дар ноҳияи Айнӣ дар деҳаи Томини Ҷамоати деҳоти Айнӣ, бо фаъолони деҳа, кумитаҳои маҳал ва муҳоҷирони меҳнатии ба ватан бозгашта вохӯрӣ гузаронида шуд.
Баромадкунандагон доир ба муҳтавои Қонунҳои Ҷумҳурии Тоҷикистон- “Дар бораи танзими ҷашну маросим дар Ҷумҳурии Тоҷикистон”, “Дар бораи масъулият барои таълиму тарбияи кӯдак”, “Дар бораи тарбияи ватандӯстии шаҳрвандон” ва “ Дар боари ворид намудани тағйирот ба Кодекси ҳуқуқвайронкунии маъмурии Ҷумҳурии Тоҷикистон” (моддаи 382-“Риоя накардани қоидаҳои истифодаи қувваи барқ ва гармӣ”), сухан ронда, таъкид намуданд, ки масъалаҳои пешгирии омилҳои номатлуби терроризму ифротгароӣ, тарғибу ташвиқи фарҳанги миллӣ, баланд бардоштани ҳисси ватандӯстӣ, ташаккули худшиносиву зиракии сиёсӣ, арҷгузорӣ ба муқадасоти давлатӣ, хизмат дар сафи Қувваҳои Мусаллаҳи Ҷумҳурии Тоҷикистон, ҳифзи арзишҳои фарҳангӣ миллӣ, тарғиби тарзи ҳаёти солим ва пешгирии ҷудошавии оилаҳои ҷавон дорои аввалиндараҷа мебошанд.
Дар рафти вохӯрӣ мудири бахши Хадамоти муҳоҷират дар ноҳия Б. Ғайбуллоев ба самъи сокинон расонид, ки шахсоне, ки дар Федератсияи Россия кор мекунад ва ҳуҷҷатҳои худро (шиносномаи хориҷӣ, корти муҳоҷиратӣ, патент ё дигар ҳуҷҷат) гум кард. Муҳим аст, ки зудтар амал кунад, то аз ҷарима, ихроҷ (депортатсия) ё мушкилот бо корфармо пешгирӣ намояд. Гум кардани ҳуҷҷат худ аз худ сабаби ихроҷ ё бекоршавии патент (иҷозатномаи корӣ) намегардад, вале барқарор кардани он барои қонуниву расмӣ мондан дар кишвари Россия ҳатмӣ аст.
Барои барқарор кардани шиноснома — ба Консулгарии наздиктарини Ҷумҳурии Тоҷикистон муроҷиат кунед, барои дигар ҳуҷҷатҳои муҳоҷиратӣ ё корӣ — ба шуъбаи Раёсат оид ба масъалаҳои муҳоҷирати Сарраёсати Вазорати корҳои дохилии Федератсияи Россия (УВМ МВД России) ё маркази хидматрасонии наздиктарин (МФЦ). Вохӯрӣ дар вазъияти самимӣ бо саволу ҷавобҳои зиёд гузашт.
Маркази матбуоти Хадамоти муҳоҷират
