Тибқи нақша чорабиниҳо бахши Хадамоти муҳоҷират дар ноҳияи Деваштич ҳафтаи сипаригардида бо сокинон ва раисони маҳаллаҳо чорабиниҳои иттилоотӣ  баргузор намуд.

Дар вохӯрӣ вобаста ба масъалаҳои истифодаи дурусти қувваи барқ, даъвати ҷавонон ба сафи Қувваҳои мусаллаҳ, пешгирии шомилшавии ҷавонон ба ҳизбу ҳаракатҳои ифротӣ, муҳоҷирати бехатар, оид ба татбиқи стратегияи давлатии муқовимат бар зидди коррупсия, ибрози андеша карда шуд.

Масъулин ба шаҳрвандоне, ки хоҳиши сафар барои фаъолияти меҳнатӣ ба кишварҳои хориҷа, аз ҷумла Федератсияи Россия доранд, дар бораи тартиби дароз намудан ва ё кам намудани муҳлати будубоши шаҳрвандони хориҷӣ ва шахсони бешаҳрванд дар Федератсияи Россия, ба расмият даровардани ҳуҷҷатҳо, гирифтани патент, қайди муваққатӣ, бастани шартнома бо кордиҳанда ва дигар масъалаҳои мубрами рӯз маълумот доданд.

Ҳамзамон, ба таваҷҷуҳи ҳозирин расонида шуд, ки имрӯзҳо дар қаламрави Федератсияи Россия 19 намуди растанӣ таҳти назорати давлатӣ қарор дошта, барои парваришу нигоҳдории ин растаниҳо тибқи моддаи 231-и Кодекси ҷиноятии Федератсияи Россия ҷавобгарӣ муқаррар шудааст.

Яке аз чунин растаниҳо ин “Ҳазориспанд” ё “Гармала” мебошад, ки алкалоидҳо ба монанди гармалину гармин ва хусусияти психоактивӣ дорад. Ин растанӣ барои ворид, муомилот ва истеъмол дар ҳудуди Россия қатъиян манъ шудааст.

Бинобар ин, аз ҳар як шаҳрванди Ҷумҳурии Тоҷикистон даъват ба амал меорем, ки ҳангоми сафар ба Федератсияи Россия аз бурдани ҳазориспанд худдорӣ намоянд ва ба хотири чанд миқдор маблағ ҳаёти худу оилаи худро зери хатар нагузоранд.

Инчунин, масъулини Хадамоти муҳоҷират дар ноҳияҳои Деваштич ва Зафаробод аз рафти корҳои сохтмони муҳоҷирони дохилӣ ва экологӣ ноҳияи Деваштич, ки ба ноҳияи Зафаробод кӯчонида мешаванд дидан намуда, ҷиҳати ҳарчи зудтар анҷом додани корҳои сохтмонӣ корҳои фаҳмондадиҳӣ гузарониданд.

Раёсати Хадамоти муҳоҷират дар вилояти Суғд