Гурӯҳи кории Хадамоти муҳоҷират корҳои фаҳмондадиҳиро дар “Фурудгоҳи байналмилалии шаҳри Душанбе” дар байни шаҳрвандони ҷумҳурӣ, ки тавассути парвоз ба кишварҳои хориҷа, аз ҷумла Федератсияи Россия сафари корӣ менамоянд, бо маром идома дода истодаанд.

Зимни вохӯрӣ бо шаҳрвандон гурӯҳи кории Хадамот, оид ба тағйиру иловаҳо дар қонунгузории Федератсияи Россия дар самти муҳоҷират сухан ронда қайд карданд, ки шахсоне, ки ба Федератсияи Россия барои фаъолияти меҳнатӣ сафар доранд, ҳангоми убури сарҳади ин кишвар, ба сарҳадчиён маълумоти дақиқ оиди фаъолияти корӣ дар ин кишвар пешниҳод намоянд.

Ҳамзамон дар рафти суҳбат бо чанд нафар шаҳрвандоне, ки аз кишвари Россия берун карда шуда буданд, дар суҳбат қайд карда шуд, ки ин нафарон ҳангоми фаъолияти меҳнатӣ бе ягон ҳуҷҷати тасдиқкунанда, аз ҷониби мақомоти дахлдори ин кишвар берун карда шуданд.

Онҳо аз ин рафтори худ пушаймон шуда, омодаанд фаъолияти меҳнатии худро дар дохили кишвар идома диҳанд. Инчунин, гурӯҳи кории Хадамот ба онҳо тавсия доданд, ки руҳафтода нашуда ба Раёсати Агентии меҳнат ва шуғли аҳолӣ дар шаҳру ноҳия ва вилоятҳои ҷумҳурӣ муроҷиат намуда дар дохили кишвар соҳиби ҷойи кории холӣ гарданд.

Аз ҷумла, онҳо метавонанд дар ширкатҳои сохтмонии ҶСК “НБО Роғун” фаъолияти меҳнатии худро идома диҳанд.

Зимни суҳбатҳо бо шаҳрвандон аз ҷониби гурӯҳи корӣ, чанд сухан дар бораи вазъи имрӯзаи муҳоҷират дар Федератсияи Россия сухан гуфта, қайд намуданд, ки муҳоҷирони меҳнатие, ки азми сафари кишвари Россия доранд, оид ба талаботи нави қонунгузории Федератсияи Россия дар самти муҳоҷирати меҳнатӣ огоҳ бошанд, тартиб ва мақсади воридшавӣ, дар муҳлати муқаррар гардида ҷамъоварӣ ва пешниҳод намудани маводи зарурӣ ба ВКД ФР оид ба муҳоҷирати минтақавӣ барои гирифтани патент ва риояи муҳлати будубоши муваққатии шаҳрвандони хориҷӣ ва ба вуҷуд омадани мушкилиҳои эҳтимолӣ барои шаҳрвандони Ҷумҳурии Тоҷикистон, ки хоҳиши фаъолияти меҳнатиро дар қаламрави ин давлат доранд, пеш меояд, ошно намуда, роҳҳои ҳалли онро низ ба онҳо ба таври содда фаҳмонда дода, ба саволҳои онҳо ҷавобҳои мушаххас доданд.

Ҳамзамон аз шаҳрвандони ҷумҳурӣ таъкид карда шуд, ки пеш аз сафар ба кишвари Россия ҳатман забони давлатии ин кишварро дар доираи муошират донанд, тарзи либоспӯшӣ, доштани касби муносиб ва дигар масъалаҳои мубрами рӯз маслиҳатҳои муфид доданд.

Дар ин робита, Вазорати корҳои хориҷии Ҷумҳурии Тоҷикистон ба шаҳрвандони мамлакат тавсия медиҳад, ки аз сафар ба қаламрави Россия тавассути ҳамаи воситаҳои нақлиёт бе зарурат муваққатан худдорӣ намоянд.

Дар фарҷоми суҳбатҳо ба шаҳрвандон варақаҳои иттилоотӣ: Тундагро, экстремист ва террорист киҳоянд ва чаро онро бояд донист? Дар кадом ҳолатҳо шахс ба ҷавобгарӣ кашида мешавад?, Китобчаи кисагии муҳоҷири меҳнатӣ, Мо бар зидди терроризм ва экстремизм (ифротгароӣ) тақсим карда шуд.

Маркази матбуоти Хадамоти муҳоҷират