Бо мақсади гузаронидани корҳои фаҳмондадиҳӣ дар миёни шаҳрвандон – муҳоҷирони меҳнатӣ ва оилаи онҳо оид ба тағйироти қонунгузории кишварҳои қабулкунанда дар самти муҳоҷирати меҳнатӣ бо иштироки намояндагони бахши Хадамоти муҳоҷират дар ноҳияи Ашт Норбоев Дамир ва КИ ҲХДТ дар ноҳия Мавлонов Муслимбек дар Театри драмавӣ ва мусиқии ба номи Маҳмуҷон Воҳидов вохӯрии судманд баргузор гардид.
Дар ҷараёни вохӯрӣ ба таваҷҷуҳи сокинони ноҳия расонида шуд, ки
ҳар як муҳоҷир ва оилаи муҳоҷирони меҳнатӣ, ки ба хориҷа сафар доранд бояд пеш аз ҳама аз қонунгузорӣ, урфу одат ва маданияти давлати қабулкунанда огоҳ бошанд, зеро аз сабаби паст будани сатҳи дониши ҳуқуқӣ ва беэҳтиётӣ ҳангоми муҳоҷирати меҳнатӣ метавонад сабаби пайдоиши як қатор мушкилиҳо гардад, аз ҷумла, афтодан ба доми фиреб ҳангоми гирифтани ҳуҷҷатҳо, афтодан ба ғуломии меҳнатӣ, ба ғуломии шаҳвонӣ, фирефта шудан аз ҷониби гуруҳҳои ифротгаро, пурра ё қисман гирифта натавонистани ҳақи меҳнати худ, гирифтор шудан ба зуроварии равонӣ ё ҷисмонӣ, зуран гирифтани ҳуҷҷатҳои муҳоҷирон ва маҳдуд кардани озодии муҳоҷир аз ҷониби корфармоён ё шахсони дигар оварда мерасонад.
Дар идомаи вохӯрӣ вобаста ба тағйиротҳои охир дар қонунгузории Федератсияи Россия дар самти муҳоҷирати меҳнатӣ, вазъи ҳуқуқии аъзои оилаи муҳоҷирони меҳнатӣ, тартиби таҳсил ва идомаи таҳсил дар муассисаҳои томактабӣ ва мактабии кишвари иқомат ва дигар масъалаҳои марбут дар ин самт иттилоъ дода шуданд.
Маркази матбуоти Хадамоти муҳоҷират
