Тибқи нақшаи чорабиниҳо шуъбаи Хадамоти муҳоҷират дар шаҳри Хуҷанд бо муҳоҷирони меҳнатие, ки бозпас шудаанд, корҳои фаҳмондадиҳӣ баргузор намуд.
Тавре ба мо маълум аст, фаъолияти кории ҳар як муҳоҷири меҳнатӣ дар Федератсияи Россия ба омодагии пешакии ӯ вобастагӣ дорад. Агар хоҳед, ки ҳузури онҳо дар кишвари Россия бароятон фоидабахш ва хуш бошад, зарур аст, талаботи асосиро, ки тибқи қонунгузории давлати Россия ба шаҳрвандони хориҷӣ пешбинӣ шудааст, донанд ва риоя намоянд. Қабл аз сафар ҷойи мушаххаси зист ва кориашонро муайян кунанд. Бо худ шиносномаи хориҷӣ, дафтарчаи меҳнатӣ, ҳуҷҷати хизмати ҳарбӣ, диплом, шаҳодатнома оид ба касбу ихтисос, шаҳодатномаи ронандагӣ ва дигар ҳуҷҷатҳои лозимаро, ки шахсият ва касбу кори онҳоро тасдиқ мекунад, дошта бошанд.
Варақаҳои муҳоҷиратиро ҳангоми сафар дар дохили шиноснома нигоҳ дошта, кӯшиш намоянд, онро гум накунанд. Агар тасодуфан варақаи муҳоҷиратро гум карда бошанд, ҳатман ба мақомоти муҳоҷирати минтақавӣ мувофиқи ҷойи зист, ки онҳоро ба қайд гирифтааст, муроҷиат намоянд. Кормандон мувофиқи қонунгузории амалкунанда вазифадоранд, ба онҳо нусхаи дигари варақаи муҳоҷиратиро супоранд ва ҳуқуқҳои онҳоро дар кишварашон таъмин намоянд.
Дар вақти мулоқот бо шаҳрвандоне, ки бозпас шудаанд, ба онҳо дар бораи пешгирии ҷинояткорӣ, шомилшавии муҳоҷирони меҳнатӣ ба ҳизбу ҳаракатҳои террористӣ, экстремистӣ, ҳолати савдои одамон фаҳмонида шуда, ба муҳоҷирони меҳнатӣ, ҳамватанони муқими кишвари иқомат расонида шуд, ки ҳангоми сафар дар дохили Федератсияи Россия аз як вилоят ба вилояти дигар аз интиқоли бағоҷҳои шахсони ношинос худдорӣ намоянд.
Дар охир, оид ба тағйироту иловаҳо ба қонунгузории Федератсияи Россия дар самти муҳоҷирати меҳнатӣ, ҷиҳати будубоши шаҳрвандони Ҷумҳурии Тоҷикистон дар давлати қабулкунанда, омодагии пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди сертификат оид ба донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), доштани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, гирифтани патент, тартиб додани шартномаи меҳнатӣ, танҳо бо шиносномаи хориҷӣ ворид шудан дар алоҳидагӣ иброз намуданд.
Раёсати Хадамоти муҳоҷират дар вилояти Суғд
