Гурӯҳи кории муштараки Мақомоти иҷроияи ҳокимияти давлатии ноҳияи Фархор, Кумитаи иҷроияи Ҳизби Халқии Демократии Тоҷикистон дар ноҳия ва дигар сохторҳои марбутаи мақомоти давлатӣ тибқи нақшаи баргузории мулоқоту вохӯриҳо бо сокинони ҷамоати деҳоти Ватан мулоқот намуд.
Масъулин талаботи қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, “Дар бораи масъулият барои таълиму тарбияи кӯдак”, “Дар бораи озодии виҷдон ва иттиҳодияҳои динӣ” ва “Дар бораи тарбияи ватандӯстии шаҳрвандон” шарҳу тавзеҳ доданд.
Аз ҷумла, дар бораи истифодаи дурусти шабакаҳои иҷтимоӣ, пешгирӣ намудани шаҳрвандон аз шомилшавӣ ба ҳизбу ҳаракатҳои экстремистӣ, зӯроварӣ дар оила, муҳоҷирати бехатар, оқибатҳои ногувори хурофотпарастиву ифротгароӣ ва тақлид ба фарҳанги бегона ва дигар масъалаҳо ҷойдошта суханронӣ намуданд.
Дар вохӯрӣ, ки намояндаи Хадамоти муҳоҷират дар ноҳия иштирок дошт, ба таваҷҷуҳи сокинон расонид, ки дар асоси Қонуни Федератсияи Россия № 274 ФЗ аз 1 июли соли 2021 “Дар бораи ворид кардани тағйирот ба Қонуни Федералӣ “Дар бораи вазъи ҳуқуқии шаҳрвандони хориҷӣ дар Федератсияи Россия” ва Қонуни Федералӣ “Дар бораи бақайдгирии давлатӣ – дактилоскопӣ дар Федератсияи Россия”, ки аз 29 декабри соли 2021 ба иҷро даромад, фарзандони шаҳрвандони хориҷӣ аз синни 6 сола вазифадоранд тартиби дактилоскопия (супоридани изи ангуштон) ва аксбардориро гузаранд.
Ҳамзамон, мувофиқи Қонуни Федералии Федератсияи Россия аз 18.07.2006, № 109-ФЗ “Дар бораи бақайдгирии муҳоҷирии шаҳрвандони хориҷӣ ва шахсони бешаҳрванд дар Федератсияи Россия”, шаҳрвандони хориҷӣ, аз ҷумла кӯдакони ноболиғ, уҳдадоранд, ки дар қаламрави Россия ба қайди ҷойи иқомат гузошта шаванд.
Агар кӯдак ҳамроҳи падару модар ё намояндагони қонунии худ ворид гардад, ӯ дар ҳамон суроғае ба қайд гирифта мешавад, ки падару модар (ё намояндаи қонуниаш) сабт шудааст. Ҳамаи амалҳои зарурӣ барои гузоштани кӯдак ба қайди муҳоҷиратиро падару модар ё намояндагони қонунии ӯ иҷро мекунанд.
Дар ҳолати риоя накардани қоидаҳои муқаррарнамудаи бақайдгирии муҳоҷиратӣ метавонанд чораҳои масъулияти маъмурӣ татбиқ шаванд: ҷаримаҳои маъмурӣ, ва дар ҳолатҳои ҷудогона — хориҷ намудан (депортатсия) аз қаламрави Федератсияи Россия.
Дар охир, гурӯҳи корӣ ба саволҳои иштирокдорон ҷавобҳои мушаххас дода, ҳамчунин таваҷҷуҳи онҳо оид ба омода ва сафарбар намудани ҷавонон ба хизмати ҳарбӣ ва вусъати корҳои ободонию бунёдкорӣ дар доираи омодагиҳо ба ҷашни 35-солагии Истиқлоли давлатии Ҷумҳурии Тоҷикистон ҷалб карда шуд.
Раёсати Хадамоти муҳоҷират дар вилояти Хатлон
