Бо мақсади шарҳу тавзеҳи Паёми Президенти Ҷумҳурии Тоҷикистон гурӯҳи корӣ иборат аз шуъбаи рушди иҷтимоӣ ва робита бо ҷомеаи дастгоҳи Раиси ноҳияи Ашт, бахшҳои Хадамоти муҳоҷират, кор бо занҳо ва оила, кор бо ҷавонон ва варзиш, дин танзиму анъана ва ҷашну маросимҳо, инчунин шуъбаи Агентии меҳнат ва шуғли аҳолии ноҳия корҳои иттилоотӣ-маърифатиро дар бозори марказии шаҳраки Шайдон баргузор намуданд.

Зимни вохурӣ қайд гардид, ки Паёми имсола аз дигар паёмҳо ба куллӣ фарқ дошта, дар он бисёр масъалаҳои пурмӯҳтаво мавриди баррасӣ қарор гирифтанд.

Бо ироа гардидани Паёми навбатӣ сокинони мамлакат оид ба дастоварду пешравиҳои дар зарфи солҳои охир ноилшудаи Тоҷикистон маълумоти фаровон дарёфта, андешаи таҳияи нақшаву ниятҳои некро дар зеҳну зарфияти худ парвариданд.

Зеро нуқтаҳои ироанамудаи Пешвои муаззами миллат ҳар як шаҳрвандро ба андешаҳои созанда, рафтору кирдор ва пиндори нек раҳнамоӣ намуда, қобилияти наҷиби мафкурасозиро доро мебошад.

Дар чорабинии мазкур оид ба пешгирии шомилшавии ҷавонон ба ҳизбу ҳаракатҳои ифротӣ, пешгирии савдои одамон, омодагии пеш аз сафар, муҳоҷирати бехатар, инчунин пешгирии хуруфотпарастӣ, тарғиби либосҳои миллӣ суҳбатҳо намуданд.

Аз ҷумла, доир ба масълаҳои муҳоҷирати бехатар, мубориза бар зидди савдои одамон, пешгирии зӯроварӣ дар оила ва ҳамаи намуди табъиз нисбати занону ҷавонон, ҳаракатҳои гуногуни ифротӣ ва доир ба масъалаҳои мубрами рӯз ба самъи шаҳрвандоне, ки аз муҳоҷирати меҳнатӣ баргаштаанд ва аъзои оилаи онҳо маълумотҳои зарурӣ расонида шуд.

Дар баробари мубориза ва пешгирии шомилшавии ҷавонон ба ҳизбҳои экстремистию террористӣ ва муҳоҷирати бехатари шаҳрвандон ба давлатҳои хориҷа аз тарафи гурӯҳи корӣ бо мақсади арҷгузорӣ ба анъанаҳои миллӣ, эҳсоси ватандӯстиву худшиносии миллӣ, инчунин баланд бардоштани ҳисси зебоипарастии занону духтарон ва тарғиби либосҳои миллӣ, дури аз фарҳанги бегона корҳои тарғиботи роҳандозӣ гардид.

Бахши Хадамоти муҳоҷират дар ноҳияи Ашт