Бо мақсади баланд бардоштани сатҳи маърифати сиёсиву ҳуқуқии аҳолӣ ва тақвияти ҳисси ватандӯстиву худшиносӣ, гурӯҳи тарғиботии Кумитаи иҷроияи ҲХДТ дар ноҳияи Роштқалъа дар ҳамкорӣ бо Мақомоти иҷроияи ҳокимияти давлатии ноҳия, ки ба он намояндаи бахши Хадамоти муҳоҷират шомил аст, бо сокинони ҷамоати деҳоти ба номи Қ. Гадолиев вохӯрии навбатӣ баргузор намуданд.

Дар ҷараёни чорабинӣ масъулон вобаста ба масъалаҳои пешгирии шомилшавии ҷавонон ба ҳизбу ҳаракатҳои ифротӣ ва хатарҳои он, муҳоҷирати бехатар, қонунҳои нави ФР дар самти муҳоҷират, инчунин оқибатҳои тақлид ба фарҳангҳои бегона, суханронӣ намуда, аҳолиро ба ҳифзи арзишҳои миллӣ ва тақвияти муҳаббат ба Ватан даъват карданд.

Зимни вохӯрӣ ҳамчунин ба масъалаи сарфакорона истифода бурдани нерӯи барқ, самаранок истифода бурдани қитъаҳои замини наздиҳавлигӣ ва роҳҳои зиёд намудани истеҳсоли маҳсулоти кишоварзӣ таваҷҷуҳи махсус зоҳир гардид. Иштирокчиён вобаста ба риояи талаботи Қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, “Дар бораи масъулият барои таълиму тарбияи кӯдак” иттилооти муфассал гирифта, барои иҷрои дақиқи он ҳидоят шуданд.

Дар анҷоми вохӯрӣ, сокинон аз баргузор гардидани чунин мулоқотҳои тарғиботиву фаҳмондадиҳӣ изҳори қаноатмандӣ намуда, таъкид доштанд, ки минбаъд низ дар ҳамкорӣ бо мақомоти давлатӣ ва сохторҳои марбута ҷиҳати ҳифзи сулҳу субот ва пешрафти ҷомеа саҳми арзандаи худро мегузоранд.

Шуъбаи Хадамоти муҳоҷират дар ВМКБ