Дар заминаи ба даст овардани Истиқлоли давлатӣ ва барқарорсозии ваҳдати миллӣ кишвари мо ба мушкилоти зиёди сиёсию иқтисодӣ, иҷтимоӣ ва фарҳангӣ рӯ ба рӯ шуд, ки боиси хисороти зиёди пулию молиявӣ гардид. Аз ин рӯ, моро зарур аст, ки барои омилҳои манфии сиёсии ҷомеаи имрӯза, бахусус, терроризму ифротгароӣ мубориза бурда, пояҳои истиқлолияти давлатӣ, пойдор гардидани ваҳдати миллӣ ва таъмини суботи комилро таъмин намоем.
Худи терроризм чист? Чаро имрӯз чунин калимаҳо дар зиндагии ҳаррӯзаи мо рӯ ба рӯ мешаванд? Терроризм фаъолияте аст, ки бо мақсади эҷоди тарсу ваҳм, ба миён овардани хатарҳои марг барои одамон ва бадрафторӣ дар ҷомеа амалӣ мешаванд. Ҳадафи асосии терроризм бо истифодаи зӯроварӣ ва таҳдид ба ҳаёти инсонҳо, нақшаҳои сиёсӣ ва иҷтимоиро тағйир додан аст. Онҳо мехоҳанд, ки бо ба вуҷуд овардани ҳарос дар ҷомеа ва ё таъқиб кардани рақибони сиёсӣ, ҳамаро ба қиёс бо хоҳишҳои худ мепайванданд. Истифодаи зӯроварӣ, таҳқир, фишор ва паст кардани қадр ва эҳтироми инсонҳо, махсусан дар мавриди этникҳои гуногун, метавонад сабаби ба вуҷуд омадани ифротгароӣ бошад.
Ифротгароӣ дар ҳар шакл ва намуди худ барои ҷомеа хатарнок аст, зеро он ҳуқуқу озодиҳои инсонро поймол мекунад. Аз ин рӯ, имрӯз ҷавонони моро зарур аст, ки ба муқобили чунин зуҳуроти номатлуб мубориза бурда, барои шомил гардидан ба ҳар гуна ҳизбу ҳаракатҳо пешгирӣ намоем.
Ҳар як шаҳрванди солимфикрро лозим аст, ки фарзандони худро ҳамешагӣ зери назар гиранд ва нагузоранд, ки ҳангоми истифодаи телефонҳои мобилӣ аз шабакаҳои интернетӣ ба ҳар саҳифаҳои тасодуфӣ ворид гарданд. Зеро роҳи асосии шомилгардии ҷавонону наврасон ба ҳар гуна ҳизбу ҳаракатҳои гуногун тавассути сомонаҳои интернетӣ ва баъдан ба муҳоҷират рафтани онҳо мебошад.
Имрӯз масъалаи терроризм ва экстремизм ба яке аз мушкилоти мубрами сайёра табдил ёфта, хавфу хатар ва оқибатҳои он ба амнияту суботи тамоми кишварҳои ҷаҳон таъсири манфӣ мерасонад.
Бо масъулияти шаҳрвандӣ дар мубориза бо ҳама гуна амалҳои террористӣ устувор бояд буд, зеро расидан ба тавофуқи муассир дар ҷомеа дар мубориза бар зидди терроризм аз натиҷаҳои муҳими фаъолияти муштараки шаҳрвандон ва ниҳодҳои қудратии ҳар кишвар ба ҳисоб меравад.
Озодбекова Ситора,
Сармутахассиси бахши робита бо ҷомеаи Хадамоти муҳоҷират
