Шукрона ба 32 соли соҳибистиқлолӣ, шукрона ба сулҳу ваҳдати миллӣ, шукрона ба сарзамини ҳамешабаҳору биҳиштосо ва сад шукр ба ҳастии Асосгузори сулҳу ваҳдати миллӣ – Пешвои миллат, Президенти кишвар муҳтарам Эмомалӣ Раҳмон, ки мо ва мардуми моро барои фатҳи қуллаҳои мақсадҳоямон зафарманд гардонидаанд.
Оре, ягона ҳадафу ормоне, ки миллати тоҷик дар дил дошт, ба озодӣ расидану соҳиби давлати мустақил шудан буд. Бо шарофати Сарвари давлатамон Худованд моро ба чунин рӯз низ муносиб гардонд. Албатта, барои ба даст овардани ҳар неъмате бояд якдилона талошу заҳмат кашид, зеро бидуни меҳнати ҳалол ҳеҷ гоҳ ба роҳат шарафёб нахоҳем шуд. Ба ҳамин хотир моро зарур аст, ки минбаъд низ барои бунёди давлати демократӣ ва густурда гардидани пояҳои Истиқлолият беш аз пеш барои Ватани худ содиқ бошем. Онро дӯст дорем, хоки покашро муқаддасу гиромӣ дошта, дар ҳифзу ҳимояи он бетарафӣ зоҳир накунем.
Ояндаи Тоҷикистон маҳз дар дасти ҷавонон аст. Ба мо маълум аст, ки дар замони муосир миёни ҷамъият ҳар гуна падидаҳои номатлуб ҷой гирифта, ба зиндагонии осоиштаи халқи тоҷик халал ворид карда истодааст. Барои теша задан бар решаи чунин ташкилотҳои хатарнок, ки чун ҳашаротҳои зараррасон ба мо мушкили эҷод мекунанд мо бояд зиракии сиёсиро аз даст надиҳем.
Бояд гуфт, ки камтарин иштибоҳи мо оид ба надонистани сиёсати давлатдориамон метавонад, боиси амалигашти мақсадҳои нопоки ифротгарон гардад. Ба ҳамин хотир хеле зарур аст, ки нисбат ба тарбияи масъулиятшиносиву худогоҳии ҷавонони имрӯза аҳамияти махсус дода, то қадри имкон онҳоро ба иҷрои амалҳои нек, ба роҳи омӯзиши илм ва такмили донишҳои нав ҳидоят намоем. Мо бар зидди душманонамон танҳо бо ақлу заковат ва ифтихори ватандориамон метавонем ғалаба намоем.
Имрӯз вазифаи мост, ки ҷавононро тарбияи хештаншиносӣ дода, барои сарбаландона хизмат намудан ба Ватан омода созем. Зеро тарбияи ватандӯстии ҷавонон бевосита ба фаъолияти зиёиён вобастагӣ дорад. Ба ҳамин хотир, қабл аз ҳама, дар ниҳоди худу атрофиён ҷо намудани ҳисси баланди меҳанпарастӣ рисолати касбии мост.
Каримова Заррина,
муовини раиси ташкилоти ибтидоии ҲХДТ “Муҳоҷир”- и Хадамоти муҳоҷират
