Ҳайати гурӯҳи кории Хадамоти муҳоҷират ва зерсохторҳои он вобаста ба вазъи омаду рафти муҳоҷирони меҳнатӣ ба Федератсияи Россия дар фурудгоҳҳо ва истгоҳи роҳи оҳан бо муҳоҷирони меҳнатӣ, ки ба самти Федератсияи Россия сафар менамоянд, корҳои иттилоотӣ-маърифатӣ баргузор намуданд.
Дар суҳбат бо шаҳрвандон – муҳоҷирони меҳнатӣ, доир ба тағйироту иловаҳо ба қонунгузории Федератсияи Россия дар самти муҳоҷирати меҳнатӣ, ҷиҳати будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), доштани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, ёрии тиббӣ расонидан ба шаҳрвандони хориҷӣ дар қаламрави Федератсияи Россия, гирифтани Патент, тартиб додани шартномаи меҳнатӣ, танҳо бо шиносномаи хориҷӣ ворид шудан тавсияҳо доданд.
Ҳамзамон ба шаҳрвандон дар бораи шомил нашудан ба ҳизбу ҳаракатҳои ифротгароӣ, экстремизм ва терроризм ва муқовимат ба савдои одамон ва расонидани кумак ба қурбониёни савдои одамон суҳбатҳо намуда ба ҳар яки онҳо дастурамали мухтасар оиди муҳоҷирати меҳнатӣ, буклетҳо, варақаҳои иттилоотӣ-маърифатӣ тақсим карда шуд.
Инчунин, ба шаҳрвандон таъкид карда шуд, ки вазъияти имрӯзаи Федератсияи Россияро ба назар гирифта, бе ягон асос, беҳуда барои фаъолияти меҳнатӣ ба ин кишвар аз сафар худдорӣ намоянд.
Қайд кардан ба маврид аст, ки гузаронидани чунин вохӯриву суҳбатҳо аз ҷониби ҳайати гурӯҳи кории Хадамоти муҳоҷират ва зерсохторҳои он мунтазам гузаронида мешавад.
Маркази матуботи Хадамоти муҳоҷират
