Кормандони масъули шуъбаи Хадамоти муҳоҷират дар шаҳри Кӯлоб корҳои фаҳмондадиҳиро дар байни корҷӯён ва муҳоҷирони меҳнатии ба ватан баргашта вобаста ба масъалаҳои муҳоҷирати бехатар, донистани ҳуқуқ ва риояи қонунҳои амалкунандаи давлатҳои қабулкунанда, эмин будан аз хатарҳои гурӯҳҳои ифротиву террористӣ ва имкониятҳои мавҷудаи бакортаъминкунии муташаккилона дар хориҷ ва дохили кишвар, ҷоннок намуда истодаанд.
Дар рафти вохӯрӣ ба шаҳрвандон дар бораи муҳоҷирати бехатар, қайд гардид, ки ҳар як муҳоҷири меҳнатӣ пеш аз сафар бояд дар бораи давлати қабулкунанда, талаботи қонунгузории он дар самти муҳоҷират, донистани забон ва чи гуна худро эмин нигоҳ доштан аз хатарҳои гурӯҳҳои тундгаро ва экстремистию террористӣ маълумоти зарурӣ дошта бошанд.
Ҳангоми фаъолияти меҳнатӣ бо худ гирифтани ҳуҷҷатҳои шахсӣ ва ташхиси тиббиро оиди надоштани бемориҳои сироятӣ зарурият дошта, соҳибкасб будан ва доштани ҳуҷҷати касбӣ дар бакортаъминшавии Шумо кумак мерасонад.
Ҳамзамон барои гирифтани маълумот оиди кушода ё баста будани вуруди худ ба шуъбаву бахшҳо ва раёсатҳои Хадамоти муҳоҷирати ҷойи зист ва гирифтани машварати ройгон метавонед ба Муассисаҳои давлатӣ «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳрҳои Душанбе, Хуҷанд, Бохтар ва ВМКБ муроҷиат намоед.
Дар муҳоҷирати меҳнатӣ дар муҳлати муайяншуда бояд худро дар ҷойи зисти муваққатӣ ба қайд гирифта, дар муҳлати 30 рӯзи тақвимӣ барои анҷом додани фаъолияти меҳнатӣ патент гирифтан ҳатми буда, кӯшиш намоед, ки бо корфармо ё ширкатҳои кордиҳанда шартномаи меҳнатӣ баста баъдан фаъолияти кориро идома диҳед.
Донистани забон ва доштани ҳуҷҷати касбӣ имконияти, хуби расман ба кортаъминшавӣ дошта, вобаста ба ин барои соҳибкасб шудан ва гирифтани ҳуҷҷати касбӣ метавонед ба Филиалҳои марказҳои таълимии Агентии меҳнат ва шуғли аҳолӣ дар шаҳри Кӯлоб муроҷиат намоед.
Ҳамзамон ба ҷамъомадагон оид ба риояи қонунҳои амалкунандаи Федератсияи Россия дар самти муҳоҷират ва эҳтиром ба таъриху фарҳанги он маслиҳатҳои муфид дода шуд.
Вобаста ба масъалаи дар хориҷ ва дохили кишвар ба кор таъминшавии шаҳрвандони корҷӯй ва муҳоҷирони меҳнатӣ иттилоъ дода шуд, ки Ширкатҳои ватанӣ кормандони баландихтисос ва соҳибмалакаро бо маоши баланд ва шароити хуби корӣ ба кор таъмин мекунанд ва онҳо метавонанд ҷиҳати ҳалли ин масъала ба шуъбаи Агентии меҳнат ва шуғли аҳолӣ муроҷиат намоянд.
Ҳамзамон иттилоъ дода шуд, ки Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» – и Хадамоти муҳоҷират дар шаҳри Душанбе шаҳрвандонро ба ҷойҳои кории холӣ дар Ҷумҳуриҳои Литва, Булғория, Федератсияи Россия ва Аморати муттаҳидаи Араб аз руйи ихтисосҳои муайян ба кор даъват менамояд ва хоҳишмандон метавонанд ба телефонҳои додашуда дар тамос бошанд.
Инчунин, дар рафти суҳбат ба ҳозирин оид ба масъалаҳои хатарҳои экстремистию террористии ҷаҳони муосир, дар канор гирифтани худ аз шомилшавӣ ба ин гурӯҳӯ созмонҳо, огоҳ будан аз амалҳои одамрабоӣ ва савдои одамон, ҷавоб надодан ба паёмакҳои телефонии шахсони ношинос ва даъватҳои ғаразноки шабакаҳои интернетӣ маълумоти муфассал доданд.
Дар самти дарёфти ҷойи кор дар ташкилоту корхонаҳои шаҳр ва Ширкатҳои азими ватанӣ ба ҳозирин маълумот дода аз онҳо даъват ба амал оварданд, ки дар корхонаю ташкилотҳои шаҳр ва ширкатҳои ватани ҷойҳои кории холӣ зиёд мавҷуданд ва онҳо метавонанд ба шуъба муроҷиат намуда мушкилоти худро ҳаллу фасл намоянд.
Дар анҷоми чорабинӣ ба иштирокчиён варақаҳои роҳнамоӣ ва иттилоотӣ дар бораи будубоши муҳоҷирони меҳнатӣ тақсим карда шуд.
Раёсати Хадамоти муҳоҷират дар вилояти Хатлон
