Бахши Хадамоти муҳоҷират дар ноҳияи Ашт дар асоси нақшаи гузаронидани корҳои иттилоотӣ – фаҳмондадиҳӣ вохӯриву мулоқот бо сокинони ноҳия дар бозори марказии шаҳраки Шайдон баргузор намуд.
Бо мақсади дар амал татбиқ намудани дастуру супоришҳои Роҳбарияти Олии мамлакат, Пешвои муаззами миллат муҳтарам Эмомалӣ Раҳмон, ҷиҳати тақвият бахшидани корҳои фаҳмондадиҳӣ бо усули суҳбатҳои рӯ ба рӯ оид ба пешгирии шомилшавии ҷавонон ба ҳизбу ҳаракатҳои экстремистиву террористӣ, савдои одамон, муҳоҷирати бехатар, пешгирии бегонапарастӣ ва пос доштани фарҳанги аҷдодии миллӣ ва дигар масъалаҳои мубрами рӯз пайваста миёни сокинони ноҳия мулоқоту вохӯриҳо гузаронида шуда истодааст.
Дар рафти вохӯрӣ қайд карда шуд, ки гурӯҳҳои ифротӣ, ки одатан бо идеологияҳои тундгароёна ва зӯроварӣ алоқаманданд, таҳдиди ҷиддӣ ба амнияти миллӣ ва байналмилалӣ мебошанд.
Онҳо ба истифода аз идеологияҳои динӣ, сиёсӣ, иҷтимоӣ кӯшиш мекунанд, ки ақидаҳо ва ҳадафҳои худро бо роҳи зӯроварӣ ва норозигӣ пиёда созанд.
Дар ҳақиқат, ҳар як инсони оқил бояд ифтихор намояд, ки дар тӯли солҳои Истиқлолияти давлатии Ҷумҳурии Тоҷикистон бо сарварии Пешвои миллат чи қадар дигаргуниҳои куллӣ дар бобатӣ ба эътидол овардани вазъи сиёсию иқтисодии мамлакат, дарёфт намудани роҳи рушди босуботи иқтисодию иҷтимоии кишвар ва дар ин асос баланд бардоштани сатҳи зиндагии мардум ба амал омадааст.
Ҳарчанд, ки роҳи тайнамудаи Тоҷикистон дар ҷодаи ваҳдату якпорчагӣ ҳамвору яксон набуд, вале мардуми шарафманди мо ба хотири таҳкими пояҳои давлатдории миллӣ, ҳифзи марзу буми аҷдодӣ, сарҷамъии миллат, густариши фазои сулҳу оромӣ ва тақвияти худшиносии миллӣ саъю талошҳои бесобиқа анҷом додаанд ва итминони комил дорем, ки наслҳои оянда аз онҳо ҳамчун намунаи ватандориву ватандӯстӣ ёд хоҳанд кард.
Ҳар як фарди бонангу номус ва худогоҳи ҷомеа бояд ҳамеша дар хотир дошта бошад, ки танҳо истиқлолияту озодӣ омили муҳимтарини пойдории давлат ва бақои миллат мебошад ва вазифаи ҳамаи мост, ки ба хотири ҳифзу тақвияти ин муқаддасоти миллӣ пайгирона кӯшиш намоем.
Чунин як вохӯрии судманд, бо ибтикори шуъбаи Хадамоти муҳоҷират дар шаҳри Хуҷанд бо раисони кумитаҳои маҳаллаҳои шаҳри Хуҷанд низ баргузор гардид.
Раёсати Хадамоти муҳоҷират дар вилояти Суғд
