Шуъбаи Хадамоти муҳоҷират дар шаҳри Исфара дар ҳамбастагӣ бо Мақомоти иҷроияи ҳокимияти давлатии шаҳр, шуъбаи кор бо занон ва оила ва Раёсати маорифи шаҳр бо фаъолону сокинони ҷамоат, раисони маҳаллаҳо, имомхатибон ва оилаҳои муҳоҷирони меҳнатӣ дар Ҷамоати деҳоти Чоркӯҳ бо иштироки зиёда аз 130 нафар вохӯрии навбатӣ доир намуданд.

Мулоқот таҳти роҳбарии муовини раиси шаҳри Исфара – Бобоиён М., доир гашт.

Дар вохӯрӣ баромадкунандагон оид ба мавзӯъҳои гунонгун суханронӣ намуданд. Аз тарафи сардори шуъбаи Хадамоти муҳоҷират дар шаҳри Исфара Ахмедов М., вобаста ба масъалаҳои бо ҷойи кор таъмин намудани муҳоҷироне, ки воридшавиашон ба кишвари Россия манъ гаштааст дар ширкатҳои сохтмонии ҶСК “НБО Роғун”, муҳоҷирати бехатар ва муқовимат ба савдои одамон, оид ба вазъи муҳоҷирони шаҳри Исфара, ки дар Федератсияи Россия фаъолияти меҳнатӣ доранд, инчунин дар бораи пешгирии шомилшавии ҷавонон ба ҳизбу ҳаракатҳои номатлуб ва мубориза алайҳи терроризм ва экстремизм, хусусан дар муҳоҷират, суханронӣ намуд.

Аз ҷумла, қайд кард, ки савдои одамон, яке аз кирдорҳои хавфноки ҷамъиятие мебошад, ки характери трансмилӣ дошта, ба мушкилоти глобалии ҷомеаи ҷаҳонӣ табдил ёфтааст. Сабаби трансмилӣ арзёби намудани ин ҷиноят дар он аст, ки он бо роҳи убури марзҳои ду ва ё зиёда давлатҳо содир карда мешавад.

Солҳои охир ин кирдор ба яке аз сердаромадтарин ҷинояти фаромиллӣ табдил ёфтааст. Имрӯз ҷомеаи ҷаҳонӣ эътироф намудааст, ки савдои одамон (ки онро трафик низ меноманд) дар шаклҳои гуногуни зуҳури худ (истисмори шаҳвонӣ ва меҳнатӣ, ғуломии маишӣ, ҷалб намудан ба иқтисодиёти ниҳонӣ ва ғайра) яке аз шаклҳои барои инсоният хатарноки фаъолияти ҷинояткоронаи муташаккил ва вайронкунии ҳуқуқи инсон мебошад.

Дар охир ба суолҳои сершумори иштирокдорон посухҳои мушаххас дода шуд.

Шуъбаи Хадамоти муҳоҷират дар шаҳри Исфара