Шуъбаи Хадамоти муҳоҷират дар шаҳри Исфара дар Ҷамоати шаҳраки Нурафшон бо фаъолону сокинони ҷамоат, раисони маҳаллаҳо ва аъзои оилаҳои муҳоҷирони меҳнатӣ бо иштироки зиёда аз 150 нафар шаҳрвандон вохӯрӣ доир намуд.

Мулоқот таҳти роҳбарии муовини раиси шаҳри Исфара – Бобоиён М., доир гашт. Дар вохӯрӣ муҳтавои Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки санаи 28 декабри соли 2023 ироа гардида буд, ба аҳли нишаст расонида шуд.

Сардори шуъбаи Хадамоти муҳоҷират дар шаҳри Исфара Ахмедов М., вобаста ба ҷойи кор таъмин намудани муҳоҷирони манъгашта дар ҶСК “НБО Роғун”, муҳоҷирати бехатар ва оиди зӯроварӣ дар оила, даст ба худкушӣ задани занҳо, муқовимат ба савдои одамон, пешгирӣ аз бемориҳои сироятӣ, пешгирии шомилшавӣ ба ҳизбу ҳарактҳои номатлуб ва мубориза алайҳи терроризм ва экстремизм, хусусан дар муҳоҷират, роҳ надодан ба нақзи ҳуқуқу ӯҳдадориҳои шаҳрвандони кишвари қабулкунанда, риояи талаботҳои қонунгузории кишвари мазкур, оиди роҳ надодан ба ришвахӯрӣ ва дигар амалҳои коррупсионӣ, инчунин оид ба вазъи муҳоҷирони шаҳри Исфара, ки дар Федератсияи Россия фаъолияти меҳнатӣ доранд, суханронӣ намуд.

Дар охир ба суолҳои сершумори иштирокдорон посухҳои мушаххас дода шуд.

Ҳамзамон бо ибтикори бахши Хадамоти муҳоҷират дар шаҳри Бустон дар маҳаллаи Гулистони шаҳр бо иштироки муҳоҷирони меҳнатӣ ва аъзои оилаи онҳо корҳои иттилоотӣ – маърифатӣ гузаронида шуда ба шаҳрвандон варақаҳои иттилоотӣ тақсим карда шуд.

Бояд қайд кард, ки бурдани корҳои иттилоотӣ – маърифатӣ дар дигар маҳаллаҳои шаҳр низ дар назар аст.

Раёсати Хадамоти муҳоҷират дар вилояти Суғд