Дар доираи лоиҳаи “Барномаи сафар” аз ҷониби намояндагони Вазорати меҳнат, муҳоҷират ва шуғли аҳолии Ҷумҳурии Тоҷикистон ва ТҶ “Гендер ва тараққиёт”, инчунин кормандони раёсати Хадамоти муҳоҷират дар вилояти Суғд дар ҶСК “Фурудгоҳи байналмилалии Хуҷанд” бо муҳоҷирони меҳнатие, ки тавассути парвоз ба Федератсияи Россия сафар менамуданд, пеш аз сафар бо онҳо ҳамсуҳбат шуда, дастурҳои муфид доданд.
Қайд карданд, ки пеш аз сафар барои пешгирии хатарҳои муҳоҷират, шаҳрвандон бояд бидонанд. Ба пешниҳоди ёру дӯстон ва дигар ашхоси шиносу ношинос дар бораи ёфтани кори сердаромад дар хориҷи кишвар бовар накарда, то кадом андоза асоснок будани кори ба шумо пешниҳод шударо тариқи интернет санҷед, яъне дақиқ намоед, ки оё дар асл чунин корхона вуҷуд дорад ё не, музди меҳнат ва шароити кориаш чӣ гуна аст.
Ба шахсони тасодуфие, ки ба шумо дар кишварҳои хориҷӣ кори осону пули калон ваъда медиҳанд ва ҳатто омодаанд, ки пули чиптаи ҳавопаймо ва дигар хароҷотҳои сафарро пардохт намоянд, бовар накунед, зеро аксаран чунин афроди ҷиноятпеша бо хариду фурӯши одамон машғул буда, бо ваъдаҳои бардурӯғ муҳоҷирони меҳнатиро ба дом меафкананд ва қарзи калонеро ба гарданашон бор карда, ҳамчун ғуломи меҳнатӣ ё шаҳвонӣ истифода мебаранд.
Роҳи аз ҳама хуб ва бехатари пайдо кардани кор дар хориҷи кишвар муроҷиат намудан ба идораҳо ва ташкилоту созмонҳои расмие мебошад, ки бо масоили муҳоҷират машғуланд.
Қайд кардан ба маврид аст, ки ҳамаруза кормандони раёсати Хадамоти муҳоҷират дар вилояти Суғд ба ҶСК “Фурудгоҳи байналмилалии Хуҷанд” ва “Истгоҳи роҳи оҳани Хуҷанд” ташриф оварда, пеш аз сафар бо муҳоҷирони меҳнатӣ корҳои фаҳмондадиҳӣ баргузор намуда истодаанд.
Маркаи матбуоти Хадамоти муҳоҷират
