Кормандони масъули МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе корҳои фаҳмондадиҳиро дар байни шаҳрвандони ҷумҳурӣ – муҳоҷирони меҳнатӣ дар “Фурудгоҳи байналмилалии шаҳри Душанбе” идома дода истодаанд.
Дар суҳбат ба муҳоҷирони меҳнатӣ – шаҳрвандони ҷумҳурӣ, ки тавассути ҳавопаймо ба минтақаҳои гуногуни Федератсияи Россия сафар мекунанд бори дигар таъкид карда шуд, ки давоми як ҳафтаи охир фишор болои муҳоҷирони корӣ дар Россия зиёд шуда истодааст. Барои вуруди шаҳрвандон ба ҳудуди ин кишвар монеаҳои зиёд эҷод гардиданд. Ба садҳо муҳоҷирони корӣ дар фурудгоҳҳои Россия иҷозаи вуруд надода онҳоро бозпас ба ватан фиристоданд. Аз ин лиҳоз, ба таваҷҷуҳи ҳозирин расонида шуд, ки тибқи Фармони Президенти Федератсияи Россия аз 28 апрели соли 2025, таҳти №272 “Оиди ворид намудани тағйироту илова ба Фармони Президенти Федератсияи Россия аз 30 декабри соли 2024, № 1126”, муҳлати қонунигардонӣ дар Федератсияи Россия то 10 сентябри соли 2025 тамдид карда шуд.
Шаҳрвандони Ҷумҳурии Тоҷикистон, ки дар қаламрави Федератсияи Россия бе ҳуҷҷати расмӣ қарор доранд, имконият доранд, ки то санаи 10 сентябри соли 2025 ҳуҷҷатҳои худро ба расмият дароранд.
Таъкид гардид, ки дар ҳолати пайдо гардидани саволҳо дар ин самт метавонанд ба масъулини Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ФР дар самти муҳоҷират муроҷиат намоянд.
Ҳамзамон, дар рафти вохӯрӣ ба шаҳрвандон, бори дигар оид ба тағйиру иловаҳо дар қонунгузории Федератсияи Россия дар самти муҳоҷират сухан ронда қайд карданд, ки шахсоне, ки ба Федератсияи Россия барои фаъолияти меҳнатӣ сафар доранд, ҳангоми убури сарҳади ин кишвар, ба сарҳадчиён маълумоти равшан пешниҳод намоянд ва ба саволҳои онҳо ҷавобҳои аниқ диҳанд.
Инчунин, пеш аз сафар ба ин кишвар забони давлатии онро дар сатҳи муошират донанд, касби муносиб дошта бошанд ва қонунҳои будубоши ин кишварро риоя намоянд. Ҳангоми ба кишвари Россия ворид шудан, ҳатман гирифтани патент, қайди муваққатӣ, шартномаи меҳнатӣ бастан бо кордиҳанда ва дигар масъалаҳои мубрами рӯзро фаромӯш накунанд.
Дар фарҷоми вохӯрӣ ба шаҳрвандон варақаҳои иттилоотии Хадамоти муҳоҷират тақсим карда шуд
Маркази матбуоти Хадамоти муҳоҷират
