Кормандони масъули дастгоҳи маркази Хадамоти муҳоҷират ва Раёсати Хадамоти муҳоҷират дар шаҳри Душанбе ҳангоми суҳбату вохӯрӣ бо шаҳрвандони ҷумҳурӣ – муҳоҷирони меҳнатӣ дар “Фурудгоҳи байналмилалии шаҳри Душанбе” пайваста корҳои иттилоотӣ – фаҳмондадиҳиро ҷиҳати муҳоҷирати бехатар, роҳҳои пешгирӣ намудани худ аз гурӯҳҳои ифротгаро, экстремизму терроризм, риояи қоидаҳои будубош ва қонунҳои нави амалкунандаи Федератсияи Россия, роҳандозӣ намуда истодаанд.
Ба таваҷҷуҳи шаҳрвандони ҷумҳурӣ расонида мешавад, ки тибқи иттилои мақомотҳои марбутаи Федератсияи Россия аз аввали соли 2025 бо дар назардошти пешниҳод накардани маълумот дар бораи фаъолияти меҳнатӣ 21,5 ҳазор иҷозатномаҳои фаъолияти меҳнатии шаҳрвандони хориҷӣ дар кишвари иқомат бекор карда шудааст, ки дар муқоиса ба ҳамин давраи соли 2024 масъалаи мазкур се маротиба афзоиш ёфтааст.
Иттилоъ медиҳем, ки тибқи талаботҳои қонунгузории Федератсияи Россия шаҳрвандони хориҷӣ дар муҳлати ду моҳ пас аз гирифтани иҷозатномаи фаъолияти меҳнатӣ (патент) вазифадоранд, ки ба раёсати ноҳиявии Вазорати корҳои дохилии ФР ҷойи зисти худ оид ба имзо расонидани шартномаи фаъолияти меҳнатӣ бо корфармо маълумот манзур намоянд.
Намунаи пешниҳод намудани маълумотнома дар бораи шартномаи меҳнатиро, ки дар асоси фармони Вазорати корҳои дохилии Федератсияи Россия аз 5 сентябри соли 2023, №655 тасдиқ шудааст, дар линки мазкур пешниҳод менамоем.
Барои пешниҳод намудани маълумот ба мақомоти ҳудудӣ се роҳи қонунӣ вуҷуд дорад:
1. Тавассути хизматрасонии почтаи давлатии “Почта Россия” (бо дар назардошти пешниҳод намудани маълумот оид ба дастрас намудан ба мақомоти салоҳиятдор);
2. Тавассути портали ягонаи давлатии “Госуслугы”;
3. Шахсан ташриф овардан ба муассисаи давлатии федералии буҷетии “Маркази хизматрасонии шиносномаву виза” – и ВКД ФР дар минтақаи фаъолияти меҳнатӣ, барои шаҳри Москва ва вилояти он “Сахарово”;
Дар ҳолати риоя нагардидани талаботи қонунгузории кишвари иқомат шаҳрванди хориҷӣ дар Федератсияи Россия вазъи ҳуқуқии худро аз даст дода, ҳуҷҷатҳои ба дастоварда дар самти фаъолияти меҳнатӣ ба таври худкор бекор карда шуда, шаҳрванд ба Феҳристи шахсони назоратшаванда ворид карда мешавад.
Дар поёни вохӯрӣ ба саволҳои сершумори шаҳрвандони ҷумҳурӣ – муҳоҷирони меҳнатӣ ҷавобҳои қаноатбахш дода шуда, ба онҳо варақаҳои иттилоотӣ – маърифатӣ, брошюраҳои Хадамоти муҳоҷират оид ба муҳоҷирати бехатар, тундгаро, экстремист ва террорист киҳоянд ва дар кадом ҳолатҳо шахс ба ҷавобгарӣ кашида мешавад тақсим гардида, ба муҳоҷирони меҳнатии ба ватан бозгашта ва он нафароне, ки воридшавиашон ба кишвари Россия манъ аст, барои дарёфти ҷойи кор бо музди меҳнати арзанда дар ширкатҳои бузурги дохили кишвар, тавсияҳои муфид дода шуд.
Маркази матбуоти Хадамоти муҳоҷират
