Кормандони масъули Раёсати Хадамоти муҳоҷират дар вилояти Суғд ҷиҳати пурзур намудани корҳои фаҳмондадиҳӣ пеш аз сафар бо шаҳрвандон дар “Истгоҳи роҳи оҳан”-и ноҳияи Бобоҷон Ғафуров, ки тавассути қатора ба шаҳри Волгогради кишвари Россия сафар менамуданд, корҳои фаҳмондадиҳӣ доир намуданд.

Масъулин  ба  шаҳрванднон доир ба навовариҳои қонунҳои амалкунанда дар Федератсияи Россия суҳбат намуда,  қайд карданд,  ки шаҳрвандони хориҷие, ки ғайриқонунӣ дар қаламрави Федератсияи Россия қарор доранд, танҳо 2 моҳ барои танзими мақоми ҳуқуқии худ ё хориҷ шудан аз қаламрави Россия дар ихтиёр доранд.

Дар акси ҳол, нисбати онҳо чораҳои вобаста ба ихроҷ ва манъи вуруд ба Россия дар оянда татбиқ мегарданд.

Хотиррасон менамоем, ки баъди 10 сентябри соли 2025 муҳлати амали Фармони №1126, ки ба шаҳрвандони хориҷӣ ва шахсони бешаҳрванд ҳуқуқ медиҳад, то мақоми ҳуқуқии худро танзим намоянд, ба поён мерасад. Пас аз 10 сентябри соли 2025 танзими мақоми ҳуқуқӣ ғайриимкон мегардад.

Барои ҳалли масъалаи будубоши минбаъдаи қонунии худ дар қаламрави Россия, шаҳрвандони зикршуда бояд то 10 сентябри соли ҷорӣ муроҷиат намоянд ба:

1. Ҳар як филиали ФГУП “ПВС” ВКД Россия (дар ҷои иқомати воқеӣ);

2. МБМ “Сахарово”- и (барои шаҳрвандоне, ки дар шаҳри Москва иқомат доранд);

3. Наздиктарин шуъбаи масъалаҳои муҳоҷирати мақомоти ҳудудии ВКД Россия (дар ҳолати дурии ҷуғрофӣ аз ин ташкилотҳо, дар ҳолатҳои душвор ё зарурати гирифтани машварати ҳуқуқӣ бевосита аз кормандони пулис).

Ҳамзамон, ба маълумоти шаҳрвандон расонида шуд, ки дар ҳолати пайдо шудани саволҳо дар ин самт метавонанд ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия оид ба муҳоҷират муроҷиат намоянд.

Раёсати Хадамоти муҳоҷират дар вилояти Суғд