Бо мақсади баланд бардоштани сатҳи омодагии муҳоҷирони меҳнатӣ пеш аз сафар, масъулини бахшҳои Хадамоти муҳоҷират дар шаҳри Бустон, дар ҶСК “Фурудгоҳи байналмилалии Хуҷанд” ва МД “Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Хуҷанд, пеш аз сафар бо муҳоҷирони меҳнатӣ корҳои фаҳмондадиҳӣ-маърифатиро дар “Истгоҳи роҳи оҳани Хуҷанд” ҷоннок намуда истодаанд.
Дар рафти суҳбату вохӯрӣ бо шаҳрвандон, масъалаҳои тарзи фаъолияти меҳнатӣ, дуруст пур кардани корти муҳоҷират, тартиби расман гирифтани иҷозатнома (патент), муҳлати иҷозатнома, тарзи дароз намудани муҳлати иҷозатнома, арзиши он, гузаштани муоинаи тиббӣ, гирифтани полиси суғуртавӣ, Сертификат оид ба донистани забони русӣ, таърих ва асосҳои қонунгузории Федератсияи Россия, тартиби дар қайди ҷойи истиқомат гузоштани шаҳрвандони хориҷа, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар, фаҳмонида шуданд.
Ҳамзамон, ба таваҷҷуҳи шаҳрвандон пеш аз сафар расонида шуд, ки ҷиҳати қонунигардонӣ дар Федератсияи Россия аз 30 декабри соли 2024, №1126 Фармони Президенти Федератсияи Россия ба тасвиб расидааст, ки аз 28 апрели соли 2025 ба он тағийрот ворид гардида, муҳоҷирони меҳнатӣ, ки мушкилот дар самти ҳуҷҷатгузории худ доранд метавонанд то санаи 10 сентябри соли 2025 вазъи ҳуқуқии худро ба танзим дароранд.
Дар ин замина, аз муҳоҷирони меҳнатӣ даъват ба амал оварда шуд, ки аз шомилшавӣ ба гурӯҳҳои ифротгароии динӣ, террористиву экстремистӣ дурӣ ҷуста, берун аз фаъолияти меҳнатӣ ба омӯзиши касбу ҳунар ва илмҳои замонавӣ машғул шаванд.Аз ҷониби шаҳрвандон ба масъулин вобаста ба масъалаи муҳоҷирати меҳнатӣ саволҳо пешниҳод гардида, ба онҳо посухҳои мушаххас гардонида шуд.
Раёсати Хадамоти муҳоҷират дар вилояти Суғд
