Вохӯрии навбатӣ дар маҳаллаи Қалъачаи Мазори Ҷамоати деҳоти Зумрад бо иштироки сардори шуъбаи Вазорати корҳои дохилии 1-и шаҳри Исфара Иссозода Н., сардори шуъбаи Хадамоти муҳоҷират дар шаҳри Исфара Ахмедов М., мудири шуъбаи кор бо занон ва оилаи шаҳр Асламӣ Ф., сардори Раёсати маорифи шаҳр Атохонзода Ҳ., Раиси кӯмаки аввалияи тиббии санитарӣ Юлдошева Ш., ва фаъолону сокинони ҷамоат, раисони маҳаллаҳо, имомхатибон ва аъзои оилаи муҳоҷирони меҳнатӣ бо иштироки зиёда аз 250 нафар шаҳрвандон, доир гашт.
Дар рафти он аъзои гурӯҳи корӣ оид ба муҳтавои Паёми Сарвари давлат, пешгирии шомилшавии гурӯҳҳои ифротгаро ва таълимоти ғайрирасмии динӣ, ҷалби ҷавонписарон ба сафи Қувваҳои Мусаллаҳи Ҷумҳурии Тоҷикистон, баланд бардоштани маърифати ҳуқуқии шаҳрвандон, пешгирии зӯроварӣ дар оила, ба касбомӯзӣ ва забономӯзӣ фаро гирифтани муҳоҷирони баргашта, пешгирӣ аз бемориҳои сироятӣ, мубориза бар зидди коррупсия, мубориза алайҳи терроризм ва экстремизм, рафти иҷрои Қонунҳои Ҷумҳурии Тоҷикистон “Дар бораи масъулияти падару модар дар таълиму тарбияи фарзанд” ва “Дар бораи танзими анъана ва ҷашну маросим дар Ҷумҳурии Тоҷикистон” сухан карданд.
Аз тарафи сардори шуъбаи Хадамоти муҳоҷират Ахмедов М., вобаста ба масъалаҳои бо ҷойи кор таъмин намудани муҳоҷирони манъгашта дар ҶСК “НБО Роғун”, муҳоҷирати беҳатар ва муқовимат ба савдои одамон, мубориза бар зидди коррупсия, оид ба вазъи муҳоҷирони шаҳри Исфара, ки дар Федератсияи Россия фаъолияти меҳнатӣ доранд, инчунин дар бораи пешгирии шомилшавии ҷавонон ба ҳизбу ҳаракатҳои номатлуб, ҳамзамон, оид ба иҷрои Фармони Президенти Ҷумҳурии Тоҷикистон аз 1 июни соли 2021, № 187 “Дар бораи Стратегияи муқовимат ба экстремизм ва терроризм дар Ҷумҳуриии Тоҷикистон барои солҳои 2021-2025”ва дигар масъалаҳои мубрами рӯз, суханронӣ карда шуд.
Дар охир ба суолҳои сершумори иштирокдорон посухҳои мушаххас дода шуд.
Раёсати Хадамоти муҳоҷират дар вилояти Суғд
