Дар доираи нақша чорабиниҳои муштарак гурӯҳи кории Мақомоти иҷроияи ҳокимияти давлатии ноҳияи Шаҳритус, ки бахши Хадамоти муҳоҷират шомил аст, мулоқоту вохӯриҳо бо сокинон, фаъолон, муҳоҷирони ба ватан бозгашта ва аъзои оилаи онҳо корҳои фаҳмондадиҳиро идома дода истодаанд.

Дар вохӯрии мазкур баромадкунандагон, сокинони ноҳияро ҷиҳати тарбияи ҷавонон дар рӯҳияи ватандӯстӣ, пешгирии ҷинояткорӣ ва шомилшавии онҳо ба гурӯҳҳои эктремистию террористӣ, таълими ғайрирасмии динӣ, ҷалби ҷавонону наврасон ба варзиш, тарғиби либоси миллӣ, пешгирии фарҳанги бегонапарастӣ, худкушӣ дар байни занону бонувон, пешгирии ҷудошавии оилаҳои ҷавон, никоҳи бармаҳал, эҳёи ҳунарҳои мардумӣ ва таомҳои миллӣ, истифодаи самараноки заминҳои наздиҳавлигӣ, инчунин, даъвати ҷавонон ба хизмати ҳарбӣ суханронӣ намуданд.

Инчунин, дар рафти вохӯрӣ намояндаи бахши Хадамоти муҳоҷират, доир ба тағйироту иловаҳо ба қонунгузории Федератсияи Россия дар самти муҳоҷирати меҳнатӣ, будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди Сертификат оид ба донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), доштани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, гирифтани Патент, тартиби дар қайди ҷойи истиқомат гузоштани шаҳрвандони хориҷа, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар фаҳмонида шуд.

Ҳамзамон, ба самъи сокинони ноҳия расонида шуд, ки барои муайян намудани вазъи ҳуқуқии худ аз сомонаҳои расмии Вазорати меҳнат, муҳоҷират ва шуғли аҳолии Ҷумҳурии Тоҷикистон mehnat.tj, саҳифаи телеграм t.me/mlmert, Хадамоти муҳоҷират migration.tj, Намояндагии Вазорат дар ФР оид ба муҳоҷират prmstj@mail.ru истифода намоед.

Дар хатми вохӯрӣ ба ҳар як сокини ноҳия дастурамали мухтасар оид ба муҳоҷирати меҳнатӣ брошюраҳо, варақаҳои иттилоотӣ-маърифатӣ тақсим карда шуд.

Раёсати Хадамоти муҳоҷират дар вилояти Хатлон