Бахши Хадамоти муҳоҷират дар ноҳияи Ашт якҷоя бо шуъбаи Агентии меҳнат ва шуғли аҳолии ноҳия бо мураббиён ки ҳамзамон оилаи муҳоҷирони меҳнат мебошанд дар богчаи бачагонаи «Наврӯз»-и шаҳраки Шайдон корҳои фаҳмондадиҳӣ оид ба пешгирии шомилшавии ҷавонон, муҳоҷирати бехатар ва тарғиби либоси миллӣ, пешгирии ҳурофотпарастӣ, ҳифз ва нигоҳдории фарҳанги аҷдодӣ, пешгирии ҳолатҳои коррупсионӣ дошта ва муҳтавои Паём баргузор намуданд.

Мудири бахши Хадамоти муҳоҷират дар ноҳия дар баромади худ иброз дошт, ки бунёди ҷомеа аз оила сарчашма мегирад, оилаи солим як омили муҳими пойдории давлат аст.

Маҳз фарзандони соҳибмаълумот, бо маърифат, оқилу зирак ба қадри падару модар, миллат ва Ватани азизамон расида, номбардори сазовор мегарданд.
Дар Конститутсия омадааст, ки оила асоси ҷомеа буда, таҳти ҳимояи давлат қарор дорад.

Бунёди оила масъулият ва муносибати ҷиддиро тақозо менамояд.

Оила макони тарбияи камолоти маънавию ҷисмонии шахс ба ҳисоб меравад.

Тарбияи фарзанди солим, ватандӯсту ватандор, бонангу номус вазифаи муҳим ва муқаддаси ҳар як оила мебошад.

Чӣ тавре, ки Ҷаноби Олӣ, Пешвои муаззами миллат мегуянд; “Ҳар як мамлакатро танҳо фарзандони баору номус, худогоҳу худшинос ва донишманду соҳибмаърифат обод карда метавонад”.

Аз ин лиҳоз, рисолати падару модар ва оила дар рушди миллат ва пешрафти давлат хеле бузург аст.

Имрӯзҳо, дар ин марҳилаҳои хеле ҳассос ва мураккаби таърихӣ инсоният нисбат ба тамоми давраҳои дигар ба илму маърифат, ҳифзи арзишҳои волои фарҳангиву ахлоқӣ, тамаддуни миллиамон ниёз дорад.

Дар рафти чорабинӣ қайд карда шуд, ки коррупсия падидаи номатлуби ҷомеа буда, он монеаи рушду пешрафти давлат мегардад.

Бинобар ин, ҳар як фардро зарур аст, ки барои решакан сохтани ин падидаи номатлуб ҳиссаи арзандаи худро гузорад.

Инчунин, бояд тазаккур дод, ки либоси миллӣ як рукни фарҳанги миллат ба ҳисоб рафта, ёдгоре аз гузаштагон аст, ки дар тули қарнҳо зебоиашро гум накардааст.

Таърих гувоҳ аст, ки зан ва модари тоҷик дар ҳама давру замон посдори оину анъанаҳои муқаддаси миллат маҳсуб гашта, яке аз нишонаҳои асосии фарҳангу тамаддуни миллатҳои мухталифи дунё либоси миллии онҳост.

Ба хотири ҳифз ва нигоҳдошти фарҳанги аҷдодӣ ва тарғиби либоси миллӣ, имрӯзҳо дар саросари ҷумҳурӣ аксияи «Тоҷикона мепӯшем» баргузор гардида истодааст.

Пос доштани як ҷузъи фарҳанги хеш, либоси миллии тоҷикона, ки таҷассумгари расму оин, нишони зебопарастӣ ва ифтихори ҳар халқияту миллат маҳсуб меёбад барои ҳар як зан, бонуи тоҷик шарт ва зарур аст.

Бояд қайд намуд, ки бахши Хадамоти муҳоҷират дар ноҳияи Ашт бурдани корҳои иттилоотӣ – маърифатиро мунтазам идома хоҳад дод.

Раёсати Хадамоти муҳоҷират дар вилояти Суғд